Rusiye prezidenti Vladimir Putin fevral 5-te Rusiye Havfsızlığı şurasınıñ azaları ile Ukrainanıñ cenüp-şarqındaki vaziyetini muzakere etti.
Kremlniñ matbuat hızmeti bildire ki, Donbass vaziyeti boyunca toplaşuv Frenkistan prezidenti François Hollande ve Almaniya kantsleri Angela Merkelniñ Moskva ziyaretinen bağlı.
«Vladimir Putin Havfsızlıq şurasınıñ daimiy azaları ile toplaşuv keçirdi. Ukraina cenüp-şarqındaki vaziyeti tafsilâtlıca baqıldı, şu cümleden Frenkistan prezidenti François Hollande ve Almaniya kantsleri Angela Merkelniñ Moskva ziyaretinen bağlı», – aytıla beyanatta.
Toplaşuvda baqılğan meseleler aydınlatılmay.
Malüm ki, fevral 5-te Frenkistan ve Almaniya liderleri Kiyevde Ukraina prezidenti Petro Poroşenko ile körüşmek kerekler. Ertesi künü Vladimir Putin ile körüşüv ötkerilecek.
Ğarp ve Ukraina Rusiyeni Donbasstaki separatistlerge qoltutuvda qabaatlaylar. Soñki vaqıtta Ukraina şarqında vaziyet kerginleşmekte.
