«Aqmescit» aerovokzal kompleksiniñ keñişletilmesine Qırım «ükümeti» 250-400 gektarnı ayrıcaq ola.
Bunı Qırımnıñ mülk ve topraq munasebetler «nazirliginiñ» matbuat hızmeti bildire.
«Bugün «Aqmescit» ava limanında aerovokzal kompleksiniñ imkâniyeti – bir saatte 1500 yolcunı kirgizmek. 2018 senesi yarımada yılda 10 million turistni qabul etecektir», – dep bildirdi Ava limanınıñ qurucılığı boyunca baş müdir muavini Оleg Matakov.
Beyanatta aytılğanı kibi, Aqmescit rayonı memuriyeti ile ava limanınıñ keñişletüv imkânlarını tüşünip baqacaq.
2014 senesi mart ayında, Rusiye Qırımnı işğal ekeninden soñ, Aeronavigatsiya havfsızlığı boyunca Avropa teşkilâtı (Avropa nezareti) Qırımğa, şu cümleden Aqmescit ve Aqyarğa, ava seferlerini yasaq etti. Avropa nezareti halqara grajdanlıq aviatsiyası aqqında ICAO Konventsiyasına esaslanıp, Ukrainanıñ er angi ava boşluğı üzerinde bir de bir aeronavigatsion hızmetiniñ Ukraina akimiyetine alâqası olmağan bir taraflı beyannamelerni tanımaycaq.
Qırımğa ava seferlerini şimdi yalıñız Rusiye şirketleri keçire, bazıları endi ğarbiy cezalarğa oğradı.
