Ukraina prezidenti Petro Poroşenko NATOğa muracaatta bulunıp, Ukrainağa istilâcıdan qorunmaq içün zemaneviy silâ istedi. Bu aqqında o, Die Welt alman neşirine bildirdi.
Poroşenko yanvar ayında zıddiyet kerginleşmesini hatırlattı. Bunıñnen beraber, Volnovaha ve Mariupolde elâk olğan yerli sakinlerniñ sayısını qayd etti.
«Bunıñ kibi adiseler alyansnıñ Ukrainağa yardım köstermek istegini arttırmalı, şu cümleden istilâcıdan qorunmaq içün zemaneviy silâ berilmeli. Bizler Ukraina ordusınıñ Rusiye istilâsına qarşı mudafaasını quvetleştirmek içün arbiy, tehnikiy ve mahsus yardımğa muhtacmız», – dep qayd etti Poroşenko.
Fevral 5-te Ukraina prezidenti ve AQŞ devlet kâtibi John Kerry arasında muzakereler keçirilmek kerek. Kerry Münchendeki er yıllıq havfsızlıq konferentsiyası arfesinde Kiyevni ziyaret etmekte.
Amerika tış siyaset hızmeti yolbaşçısınıñ ziyareti Ukrainağa silâ berilmesi mevzusında siyaset deñiştirilmesi vaqtında keçirile.
