Link açıqlığı

ZNO bermege istegen qırımlılar içün qıtaiy Ukrainada meskenni kirağa almağa azırlar


Ukraina aliy oquv yurtlarına kirmek içün Qıtaiy Ukrainada ZNO bermege istegen Qırım mezunlarına meskenni kirağa tutmağa azırlar.

Bunı Qırım.Aqiqatqa Halqara ukrain mektebinde bildirdiler. Mında ukrain attestatını elde etmege istegen Qırım mezunlarına distantsion tasilge keçmege tevsiye eteler.

Mektep müdir muavini Galina Parhomenko aytqanı kibi, şimdilik mektep memuriyeti ve Ukraina tasil nazirligi Qırım mezunları içün ZNO berüv yerini daa belgilemediler.

Parhomenko şunı da qayd etti ki, Herson ya Zaporojye vilâyeti ola bile, talebeler içün mesken de şu yerlerde qıdıralacaq eken.

Halqara ukrain mektebiniñ müdir muavini aytqanı kibi, künde olarğa Qırımdan 15 talebe, amma yalıñız 40-qa yaqın mezun muracaatta bulundı.

Qırım mezunları 2015 senesi mart 1-ne qadar qıtaiy Ukrainada yerleşken diger oquv yurtlarında da ğıyabiy oquşqa başlamaq içün ariza bere bileler. Berilgen malümatqa köre, 11-inci sınıf talebeleri fevral 10-na qadar ariza bermeli, çünki ZNO qayd işleri yalıñız fevral 20 kününe qadar devam etecektir.

XS
SM
MD
LG