Link açıqlığı

Livadiya sarayında «Yalta-45: keçmişi, bugüni, kelecegi» halqara konferentsiyası açıldı


"Üç büyük adam", Yalta, 1945 senesi (Arhiv fotoresimi)

Livadiya sarayında «Yalta-45: keçmişi, bugüni, kelecegi» Halqara ilmiy konferentsiyası açıldı. Onı Yalta konferentsiyasınıñ 70 yıllığına bağışladılar.

Açılış tedbirinde Rusiye Federatsiyası prezidentiniñ Qırımdaki vekili Oleg Belaventsev Vladimir Putin adından hayırlavnı seslendirdi. Mında tarihiy falsifikatsiyalarğa qarşılıq ve faşizm ile küreş aqqında laf etildi.

Bunı Krıminform bildire.

«Közlerimizniñ ögünde Ekinci cian cenkiniñ neticelerini ğayrıdan baquv kampaniyası inkişaf etmekte. Qızıl ordunıñ Büyük ğalebege qoşqan issesini eksiltecek olalar. Bunıñ episi bizni lâqayt qaldırmay. Bizler tarihiy vaqialarnıñ falsifikatsiyalarına qarşılıq kösterip, cenk aqqında kerçek malümatlarnı qorumaq kerekmiz», – aytıla Rusiye Federatsiyası prezidentiniñ selâmlav mektübinde.

Putin 1945 senesi olıp keçken Yalta konferentsiyasınıñ neticelerini «büyük bir miras» dep adladı.

Livadiyadaki konferentsiya eki kün sürecek. Mında Rusiye siyasetçileri, siyasetşınasları, tarihçıları, em de Frenkistan, Poloniya, Büyük Britaniya, Latviya alimleri iştirak ete.

Fevral 5-te Livadiyada «üç büyük adamnıñ» eykelini açacaqlar: Stalin, Churchill, Rooseveltniñ. Zurab Tsereteli azırlağan 10 tonnalıq abideni Yalta konferentsiyasınıñ 60 yıllığına tikleycek ediler, lâkin Ukraina akimiyeti ve Qırımtatar Milliy Meclisi qarşı çıqtılar.

Tedbir teşkilâtçıları Vatandaş cemiyetiniñ inkişaf fondu, Tarihiy perspektiva fondu ve Dünya fondlarınıñ halqara birligi olalar.

XS
SM
MD
LG