Bağçasaray regional meclisi qırımtatarlarnıñ aq-uquqları ve serbestliginiñ sıñırlanmasına açuvını aks ettirgen beyanatnı qabul etti.
Beyanatta aytıla ki, «Qırımnıñ şimdiki akimiyeti qırımtatarlarnı qorquzacaq ve aşalacaq ola».
Vesiqa müellifleri mezkür areketlerniñ örneklerini qayd eteler: ev, mektep, cami ve medreselerde silâlı tintüvler; qırımtatar kütleviy haber vastalarına yapılğan basqı ve tsenzura; qırımtatar halqınıñ liderleri ve faalleriniñ vatanından sürgün etilmesi; sebepsiz yaqalav, apis ve para cezaları; qırımtatarlarnıñ işten boşatılması; Qırımnıñ üç devlet tilinden biri olğan qırımtatar tilinde tasil berilmesiniñ qısqartıluvı.
«Bugün qırımtatar halqı tarihiy vatanında olıp, ğayet sert bir siyasiy basqı altında imayesiz qaldı», – aytıla beyanatnıñ metninde.
Bağçasaray regional meclisiniñ azaları qayd eteler ki, qırımtatarlar aq-uquqlarını ğayrıdan tiklemek içün qanunğa köre areket eteler.
Bağçasaray meclisi halqara toplulıq tarafından qoruv olacağına ümüt eteler.
«On yıllar devamında demokratik ve uquq qoruyıcı yollar vastasınen areket etken qırımtatar halqı siyasiy problemleriniñ al etilmesi ve uydurılğan sebepler esasında yaqalanğan Ahtem Çiygoznı azat etmek talapları mevzusında halqara toplulıqnıñ yardım olacaq, dep ümüt ete», – dep aytalar vesiqa müellifleri.
