Çarşenbe künü, fevral 4-te, Kiyevde «Free Crimea» adlı Qırım işğaline informatsion qarşılıq merkezini taqdim ettiler.
Leyha teşkilâtçısı Taras Berezovets bildirdi ki, «Free Crimea» Qırımnı Ukrainağa qaytarılmasınıñ temelini qoymaq içün meydanğa ketirildi.
Leyha qırımlı, ukrainliler ve halqara toplulıqnı yarımadada üküm sürgen vaziyet ile tanış etecek ve Rusiyeniñ informatsion cenki şaraitlerinde maarif faaliyetini alıp baracaqtır.
«Leyhanıñ daa bir vazifesi – Ukrainanıñ devlet qurumları ve diplomatik korpuslarınıñ vekilleri içün analitika azırlamasıdır», – dep ayttı Berezovets.
Onıñ bildirgenine köre, leyha iştirakçileri Qırımda insan aqlarınıñ bozulması, biznes sıqıştıruvı ve «devletleştirüv» vaqialarını qayd etip, ileride qırımlılarnıñ Rusiye Federatsiyasına qarşı halqara mahkemelerde açacaq davaları içün malümatnı toplaycaqlar.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
