Link açıqlığı

Yuqarı Rada «Viktor Yanukoviçni Ukraina prezidenti unvanından marum qaldıruv aqqında» qanun leyhasına qoltuttı. Buña 281 deputat rey berdi, dep haber ete Radio Svoboda.

Qanun leyhasınıñ müellifleri: «Batkivşçına» fraktsiyasınıñ lideri Yuliya Timoşenko ve Radikal firqanıñ lideri Oleg Lâşko, «Narodnıy front» fraktsiyasınıñ yolbaşçı muavini Andrey Teterev ve RF deputatı Sergey Skuratovskiy.

«Bu qararğa rey bermeli, lâkin aynı vaqıtta onı Ukrainağa ketirmek kerek. Bunıñ içün bizler uquq qoruyıcı organlarnıñ reberlerini bunı yapmağa zorlamalımız. Ukraina alâ daa bu cinayetçini teslim etmege rica etmedi. Yalıñız unvandan degil, para ve azatlıqtan da marum etmeli», – dep qayd ete deputat Yegor Sobolev.

Prezident unvanı adet üzre ömür boyu qala, lâkin impiçment olğan olsa, onı lâğu eteler.

Yanukoviç 2014 senesi fevral 22-ne keçer gecesi Kiyevden ketip, tezden Ukrainanı terk etti. Aynı o künü Rada onı prezident vekâletlerinden marum qaldırıp, ve bu vazifege Aleksandr Turçinovnı vaqtınca tayinledi. Yanukoviç Ukraina prezidenti olğanını aytmağa devam ete, onıñ fikirince, memlekette akimiyetni zapt ettiler.

Viktor Yanukoviç – eñ azından altı cinaiy işte adı keçken bir adamdır, onı Yevromaydan vaqtında adamlarnı kütleviy öldürüvge alâqası olğanında şekleyler. Al-azırda Rusiyede bulunğan Yanukoviç halqara qıdıruvğa ilân etildi.

XS
SM
MD
LG