Rusiye ukrainliler içün çetel pasport boyunca kiriş qaidelerini kirsetmeycek.
Bu aqqında Rusiye Tış işler nazirliginiñ beyanatında aytıla.
«Kiyevniñ bu qararı yalıñız keder duyğularını doğura, çünki Ukraina tarafınıñ bunıñ kibi areketleri neticesinde eki devletniñ millionlarnen vatandaşı arasında bağlar, qoranta ve sıñır alâqaları bozulacaq. Bizler ise, aksine, gumanitar olaraq sıñırdan keçüv qaidelerini deñiştirmege kerekmey, dep tüşünemiz», – aytıla nazirlikniñ beyanatında.
Tış işler nazirligi qayd ete ki, Ukraina tarafı Nazirler şurasınıñ Ukraina ve Rusiye sıñırından keçmek içün çetel pasport qullanılması aqqında qabul etken qararını aydınlatmadı.
Salı künü, fevral 3-te, Ukraina baş naziri Arseniy Yatsenük Ukraina Nazirler şurasınıñ qararını imzaladı. Vesiqağa binaen, 2015 senesi mart 1-den itibaren Rusiye vatandaşları Ukrainağa yalıñız çetel pasportları ile kirecekler.
Bundan evel Yuqarı Rada Rusiyeni istilâcı memleket olaraq tanıdı.
