Sovet Birliginiñ Kommunistik Firqasınıñ Merkeziy Komitetiniñ baş kâtibi İosif Stalinniñ torundan torunı Yakov Cugaşvili Qırımda Yalta konferentsiyasınıñ yıllığında «istenmez musafir» olğanını bildire.
Bunı o kendi Facebook saifesinde yazdı.
Onıñ malümatına köre, eki ay evelsi başında santıraç oyunı boyunca dünya çempionı Anatoliy Karpov olğan Halqara barışıq institutı ve Tarihiy perspektiva fondu ve Natalya Naroçnitsanıñ Demokratiya ve kooperatsiya Avropa institutı onıñ ile bağlanıp, onı Yalta konferentsiyasınıñ 70 yıllığına bağışlanğan tedbirde iştirak etmege çağırdılar.
«Babam endi yaşı sebebeinden ve sağlığı zayıf olğanından bu kibi işlerden vazgeçti, şunıñ içün meni davet ettiler. Bazı şeylerni begenmesem bile, razı oldım. Programmağa köre, tedbir konferentsiya şekilinde keçirilmeli, mında 9 arizacınıñ çıqışı planlaştırıla! Eñ azından 9 saat!», – dep yazdı Yakov Cugaşvili.
Faqat, yanvar 28 künü, Stalinniñ torunı aytqanı kibi, teşkilâtçılardan konferentsiyada onıñ bulunuvı istenmez olğanı aqqında beyanatnameni aldı.
«Fevral eki künü konferentsiya iştirakçileri ile uçaq Moskvadan Aqmescitke uçmaq kerek edi. Men Tbiliside olğanım içün, Moskvağa ertece – fevral 1 künü kelmek kerek edim. Yanvar 28 künü teşkilâtçılardan «Qırımdaki milletlerara kerginlikniñ sebebinden konferentsiyadaki iştiragiñiz istenilmez sayıla» kibi mektüpni alam.
Fevral 5 künü Livadiya sarayında «büyük üçlükke» – Yalta konferentsiyasında iştirak etken devlet başları: İosif Stalin, Franklin Ruzvelt ve Winston Çerçillge qoyulacaq abideniñ açılış tebdiri keçirilecektir. Bundan evel abideni Volgogradda yerleştirecek ediler, amma şeer ve vilâyet akimiyeti öyle de añlaşıp olamadı, şunıñ içün abide Tsereteliniñ ustahanesinde qaldı.
