«Çonğar» nezaret kiriş noqtasınıñ qarşısında Rusiye Silâlı Quvetleri öz mevzilerini pekite.
Bunı 112 telekanalınıñ efirinde Ukraina Devlet sıñır hızmetiniñ matbuat vastaları ile bağ bölüginiñ reberi Оleg Slobodân bildirdi.
«Al-azırda tarik etici areketler yoqtır. «Çonğar» kiriş noqtasınıñ qarşısında Rusiye tarafı yolaqnı müendis ceetten pekite. Bunı Rusiye Silâlı Quvetleri mevzileriniñ pekitilüvi ile bağlaymız. Ekinciden, işbu yönelişte nezaret noqtasınıñ qurucılığına azırlıq», – dedi o.
Onıñ malümatına köre, Rusiye tarafı naqliyat vastalarını pek yavaş resmiyleştire. Şunıñ içün kiriş ve nezaret noqtalarında kene de nevbetler peyda olmağa başladı.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
