«Qırım diasporası» cemaat teşkilâtı «Qırım ve Ukraina şarqından köçip kelgen balalarğa qoltutuv» leyhası çerçivesinde Kanadanıñ yerli teşebbüsler Fondunıñ yardımı ile Kiyev ve Kiyev vilâyetinde yaşağan qorantalarğa yardım köstermege azır.
Cemaat teşkilâtı bildire ki, tahminen 400 bala yardım ala bilecek. Bir balağa maddiy yardım miqdarı 1000 grn teşkil ete.
«Bundan ğayrı, balalar resim yarışı, er aftalıq hand made dersleri ve ğaliplerniñ tantanalı taqdirlev tedbirinde iştirak ete bilecekler», – dep qayd eteler «Qırım diasporasında».
Leyhada iştirak etmek içün online anketanı toldurmaq kerek.
Birleşken milletler teşkilâtınıñ malümatına köre, 2014 senesi dekabr 26-na qadar Ukrainada 610 biñ 413 insan yaşağan yerini vaqtınca deñiştirdi.
