New Yorkta BİZİMQIRIM barıştırıcı şiir leyhasını taqdim ettiler, mında Rusiye, Ukraina, Qırım, Frenkistan, İtaliya, Latviya, İrlandiya, Almaniya, İsrail, Avstraliya ve AQŞ şairleriñ Qırım aqqında rus tilinde yazılğan şiirleri oquldı.
Leyhanıñ teşkilâtçıları (aslı Qırımlı – Gennadiy Katsov ve İgor Sid) aytqanı kibi, New Yorkta KRiK Publishing House basmahanesinde dekabr ayında neşir etilgen aynı serlevalı kitap matbuat vastalarında keñ muzakere etilgen edi.
Şair ve çalğıcılarnıñ iştiragi ile keçirilgen tedbirge Merkeziy Bruklin kitaphanesine, New Yorknıñ eñ belli edebiy meydançığına, bayağı insan kelgen eken.
Tedbirniñ başında temsil tedbirine şahsen kelip olamağan şairlerniñ, şu sırada – German Vinogradov, Galina Klimova, Yevgeniy Bunimoviç, Veronika Dolina, Konstantin Kedrov, Yelena Katsüba, Aleksandr Lusıy, Vadim Mesâts, Andrey Polonskiy, İgor Lovşin ve Qırımnıñ yaş şairesi Yevgeniya Baranovanıñ video selâmlarından ibaret olğan qısqa filmni kösterdiler.
Bundan soñ leyha teşkilâtçılarına, New York ştatınıñ Uquq çıqarıcı Assambleyasınıñ muracaatını taqdim ettiler.
Seyirciler ögünde leyhanıñ teşkilâtçıları Gennadiy Katsov ve mahsus Moskvadan kelgen İgor Sidden ğayrı, AQŞ yaşağan antalogiya müellifleri de çıqışta bulundı. Şu cümleden, öz şiirlerini Yan Probşteyn, Gary Layt, Marina Tömkina, Maksim D. Şrayer, Anna Halberştadt, Helga Olşvang, Mihail Brif, Dmitriy Garanin, Mişa Mazel, Yuriy Berdan, Vitaliy Rahman ve Moskvadan kelgen daa bir musafir – şair Mihail Ayzenberg oqudılar. Bard şairleri Valeriya Korennaya ve Valentina Gindler öz şiirlerini gitara refaqatında yırladılar.
Şiirlerniñ oquvı Qırım manzaraları ve muzıka eserleri ile ozğarılmaqta edi.
BİZİMQIRIM kitabı dünyanıñ on bir memleketinden 120 müellifni topladı.
Leyha saytında aşkâr etilgen köntseptsiyağa köre, «işbu kitap – şiiriy barıştırıcı beyannamedir, Qırımnı edebiyat ve intellektual dialog meydanına, geosiyasetten geoşiiriyetke qaytarmaq ıntıluvıdır».
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
