Qırımda Rusiye federal, regional, belediye akimiyet organlarınıñ yeñişleri aqqında vesiqalı film çıqaracaqlar.
Bunı Qırım «ükümetiniñ» matbuat hızmeti bildire.
Beyanatqa köre, filmde territoriyalarnıñ içtimaiy-iqtisadiy ve yatırım inkişafınıñ meseleleri, meksen ve şeer qurucılığı, sanayi, mesken-kommunal tertibatınıñ yañartuvı, iş ve emek munasebetleri, tabiat, medeniyet, sport, tasil, tibbiy yardım seviyesiniñ eyileşüvi ve Rusiye vatandaşlarınıñ içtimaiy havfsızlığı kibi meseleler köterilecektir.
Teşkilâtçılarnıñ añlatqanına köre, film içün informatsion negiz olaraq idare organlarnıñ mesülietli hadimeriniñ ve şirket ile teşkilâtlarnıñ reberleriniñ çıqışları olacaq.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
