Link açıqlığı

Aqmescit – Resmiy sımalar Qırımnıñ aman-aman er bir sakini Rusiye pasportını aldı, dep aytsa da, Federal migratsion hızmetiniñ (FMH) bölükleri yanında alâ daa büyük nevbetler tura. İnsanlar bir aftadır mında kelip, Rusiye Federatsiyası vatandaşlığını qabul etmek içün ya da yarımadada bulunuv müddetini arttırmaq içün vesiqalarnı teslim etip olamaylar. Elektron nevbet terminalları öyle de qoyulmadı.

Aqmescitniñ Merkeziy rayonındaki FMH bölügi yanında bir qaç nevbet tizile, er biri bir qaç on insandan ibarettir. Sıra almaq içün vesiqalarnı qabul etecek odanı bilmeli.

Bir nevbet Rusiye pasportını almaq içün; ekincisi – migratsion kartınıñ müddetini arttırmaq içün, angi odağa muracaat eteceksiñiz – ilânda yazıla, – dep haber ete çette turğan qız. Azbar tarafına açılğan qapudaki ilânda vesiqalar cedveli, qabul künleri ve gümrük bergisiniñ esabı qayd etilgen. Yıl başından itibaren Rusiye pasportını almaq içün 300 ruble ödemeli. Coyulğan ya da qullanuv müddeti keçken pasport içün 1500 ruble alalar.

Toplaşqanlar arasında cedvel tizgen faaller de bar. Genç soyadını ayta: birisi seslenmese, onıñ adını sileler. Cedvelden silinmemek içün mütehassısqa kirgenine qadar er saba bölükke kelmelisiñ.

– Men bugün saba keldi, cedvelde 145-inci olam, saat 12 oldı, ne vaqıt kirecegimni bilmeyim, – dep şikâyet ete genç.

Adamlarnıñ aytqanına köre, qabul künleri hadimler 10-12 adamnı qabul eteler. Kirip olamağanlar ertesi künü keleler. Bazıları sıra kelgenine qadar afta devamında er kün FMH bölügine kelmege mecburlar. Küçük bala ile qadın ya da ihtiyar – mında farq etmey.

FMH Aqmescit bölügine kirecek olğan insanlarnıñ cedveli
FMH Aqmescit bölügine kirecek olğan insanlarnıñ cedveli

Daa bir nevbet öz başına tizile – direkte 77-nci odağa kirecek olğanlarnıñ soyadları ile kâğıt asılğan. Cedvel içün mesüliyetli kişiniñ telefonı da bar.

Nevbette turğanlar arasında sıq-sıq qavğa yüz bere: adını yazdırmağanlar doğru odağa keteler, lâkin adamlar buña izin bermeyler.

Toplaşqanlar azbarda degil, binağa kirip bekleseler, ne olur sualine kirişte turğan «samooborona» vekilleri bölük hadimleriniñ işine keder etecekler, dep cevap bereler.

Terminallar çalışmay

Qırım akimiyeti vade etken elektron nevbet terminalları FMH bölüginde öyle de çalışıp başlamadı. Ne vaqıt olacaq sualine hadimler cevap berip olamaylar.

Keçken aftanıñ ortasında Qırım Nazirler şurası reisiniñ birinci muavini Mihail Şeremet Aqmescit rayonı boyunca bölükni ziyaret etip, bu künleri terminallar çalışıp başlaycaq, dep vade etken edi. Onıñ bildirgenine köre, Qırımdaki FMH bölüklerinde bunıñ kibi terminallar qoyuldı, ve olarnı işke azırlaylar.

Mihail Şeremet
Mihail Şeremet

​«Bir-eki kün içinde bu işni bitirecekmiz, dep tüşünem. Terminallar çalışıp başlağan soñ adamlar bütün kün FMH bölüginde beklemeycekler. Olarnıñ tam sanı ve vaqıtı olacaq», – dep tekrarlay Şeremetniñ aytqanlarını Nazirler şurasınıñ matbuat hızmeti.

Onıñ qayd etkenine köre, FMHnıñ er bir bölüginde terminalnıñ yanında adamlarğa yardım etecek insan olacaq. «Terminal işini bilmegen ihtiyarlarımız bar. Mesleatçılar bu mevzuda yardımcı olıp, pasport almaq içün ya da diger hızmetler içün kerek olğan vesiqalar aqqında da malümat berecekler», – dep qayd etti baş nazirniñ birinci muavini.

«Ava yahşı olğanına qadar»

Federal migratsion hızmetinden mezkür vaziyet aqqında malümatnı alıp olamadıq. Hızmetniñ yolbaşçısı Petr Yaroş bildirdi ki, Federal migratsion hızmetiniñ bölüklerinde olğan nevbetlerniñ sebebi yarımadanıñ Rusiyege «qoşulması» aqqında «referendum» vaqtında Qırımda bulunğanını mahkemede tasdıqlağan adamlarnıñ büyük sayısı ola.

«FMS organlarına mahkeme qararı ile kelgen çetel insanlarnıñ sayısı çoqtır. Tahminlerge köre, aman-aman 40 biñ kişi. Elbet de, Rusiye Federatsiyası tarihında böyle bir raqam iç bir vaqıt olmağan edi. Biz buña ilk sefer rastkelemiz», – dep ayttı Yaroş («Krıminform» malümatı).

Onıñ bildirgenine köre, bir adamnı qabul etmek içün bir saat kete. Aqmescit rayonındaki FMH idaresinde nevbet 250 insandan ibaret.

Aqmescitniñ Merkeziy rayonındaki FMH bölüginde nevbet. 2014 senesi noyabr
Aqmescitniñ Merkeziy rayonındaki FMH bölüginde nevbet. 2014 senesi noyabr

Yaroş dey ki, Federal migratsion hızmetiniñ hadimleri vesiqalarnı qabul etecek qoşma pencerelerni açalar ve mesleatlar keçireler. «Şimdi qoşma pencereler yaparıq (Aqmescit rayonında – muar.), vatandaşlıq meseleleri boyunca bir oda qabul etken olsa, masa qoyıp, eki yerde qabul etmege tırışamız. Pasportlarda hatalar olğan Rusiye vatandaşlarını ava yahşı olğanına qadar azbarda qabul etemiz. Mence, yaqın vaqıtta nevbetler meselesini al etecekmiz», – dep ayttı Yaroş.

Qayd etmeli ki, bu sene yanvar 14-te işke tüşürilgen migratsion qanunlarğa binaen, Donetsk ve Lugansk vilâyetlerinden köçip kelgenler Ukraina vatandaşlarınıñ yarımadada bulunuv müddetini bozmamaq içün FMH bölüklerinde migratsion kartlarınıñ müddetini arttıralar. İçtimaiy ağlarnıñ Qırım qullanıcıları deyler ki, Qırımnıñ er bir şeeri ve rayonında FMH bölüklerinde aynı nevbetler tura.

Metinde Qırım yarımadasında resmiy şekilde qullanılğan ıstılalar mevcut

XS
SM
MD
LG