Qırımtatarlarnıñ milliy areketi Rusiye ükümetinine Qırım akimiyetiniñ Yaltada «Büyük üçlük»ke (İ.Stalin, F.Ruzvelt ve U.Çerçil) abide tiklemek qararı boyunca öz narazılığını bildirdi.
Mütenasip haberni Qırım.Aqiqat mühbirleri bildire.
Areket vekilleri bunı «neostalinizmniñ ğayrıdan tiklenmesi ve terror ile makemeden tış cezalav zamanına qaytması» kibi tanıylar.
«Bu kibi «aqılsız qararlarnıñ» ameliyatı Qırım toplulığını daa da ziyade böler», – denile muracaatta.
Vesiqa Rusiye prezidenti Vladimir Putin, Federatsiya Şurası ve Devlet Dumasınıñ yolbaşçılığına ve Rusiye Baş prokuraturasına yollanıldı.
«Rusiye Federatsiyasınıñ yolbaşçılığını, eger siz kerçekten de Stalin rejiminiñ halqlarğa nisbeten etken cinayetlerini takbih etseñiz, Qırım akimiyetiniñ işbu ahlâqsız qararını toqtatmağa çağıramız», – dep muracaat eteler qırımtatarlarnıñ milly areket vekilleri.
Evel Qırım «ükümetinde» Livadiyada keçirilgen Yalta konferentsiyasınıñ 70 yıllığına Zurab Tsereteliniñ «Büyük üçlükke» yapılğan 10 tonnalıq abidesini tiklemege söz bergen ediler. Bundan evel abideni Volgogradda yerleştirecek ediler, amma şeer ve vilâyet akimiyeti öyle de añlaşıp olamadı, şunıñ içün abide Tsereteliniñ ustahanesinde qaldı.
Üç ittifaq devlet – SSCB, AQŞ ve Büyük Britaniya – yolbaşçılarınıñ Qırım (Yalta) konferentsiyası 1945 senesi fevral 4-11 künleri keçe edi.
