Biñlernen kişi devlet hainliginde şeklengen ve apiske alınğan yedi balanıñ anası Svetlana Davıdova içün cezanı deñiştirmek ricası ile mektüpni imzaladı. Rusiye prezidenti Vladimir Putinge yazılğan açıq mektüpni «Novaya gazeta» derc etti.
«Bizni 37 yaşında qadın, yedi balanıñ anasına belgilengen ceza raatsızlay. Svetlana Davıdova iç bir zaman memuriy ve cinaiy mesüliyetke çekilmegen edi ve adamlar içün bir de bir telüke olmağan edi. Onıñ taqiqattan gizlenmek ne imkânı, ne de niyeti yoq: onıñ çetel pasportı bile yoq. Ve eñ esası – onıñ yedi küçük balası bar, eñ küçügi eki aylıq, onıñ anasınıñ yanında olması ğayet müimdir», – aytıla beyanatta.
Yanvar 31-de aqşam Kiyev saatine köre saat 22.55 Rusiye prezidentine mektüpni 14 102 insan imzaladı, olardan – Moskva, Sankt-Peterburg, Krasnodar, Voronej, Perm, Yekaterinburg sakinleridir. Mektüpni imzalağan adamlar arasında Rusiyeden tış belli olğan insanlar da bar: «Rus sidâşçaya» cemaat areketiniñ tesisçilerinden biri Svetlana Bahmina, alıp barıcı Leonid Parfenov, «Podari jizn» hayriye fondunıñ oyuncısı ve tesisçilerinden biri Çulpan Hamatova.
Yanvar 21-de Smolensk vilâyetiniñ sakinine qarşı Ukrainağa fayda ketirmek maqsadı ile yapılğan devlet hainligi boyunca cinaiy işni açtılar. Svetlana Davıdova 2014 senesi aprel ayında Ukraina elçihanesine muracaatta bulunıp, evine yaqın olğan arbiy bölükte askerler körünmegenini bildirgen edi. Onıñ fikirince, arbiylerni Donetskke yolladılar. Şimdi o «Lefortovo» SİZOsında buluna.
Rusiyeniñ insan aqları şurası Rusiye baş prokurorı Yuriy Çaykağa Vâzmı şeeriniñ sakini Svetlana Davıdovağa qarşı açılğan Ukrainağa fayda ketirmek maqsadı ile yapılğan devlet hainligi cinaiy işini, ve onıñ apiske alınmasını teşkermege rica etti.
