Türkiye Cumhuriyetiniñ Tış işler nazirligi Qırım akimiyetiniñ areketlerini, şu cümleden Qırımtatar Milliy Meclisi reisiniñ muavini Ahtem Çiygoznıñ yaqalanmasını takbih etti.
Bunı Türkiye nazirliginiñ resmiy saytında bildireler.
Türkiye tış işler nazirligi Qırımnıñ şimdiki akimiyeti tarafından qırımtatarlarnıñ temsil organına yapılğan basqını qayd etti.
«Ahtem Çiygoznıñ yaqalanması qırımtatar halqınıñ temsil organına yapılğan basqı ve onı qorquzmaq ıntıluvlarını isbatlay», – aytıla beyanatta.
Nazirlik Meclis liderlerinden biri eñ yaqın vaqıtta azat etilecegine ümüt beslegenini bildirdi.
«Qırımtatarlarğa nisbeten demokratik ve insan aqlarına sayğı kösterilmesini ve eñ yaqın vaqıtta Ahtem Çiygoznıñ azat etilmesini bekleymiz. Türkiye öz menfaatlarını er daim demokratik yollar ile qoruğan soydaş qırımtatarlarnıñ aqlarını qorçalamağa ve olarnıñ vaziyetini taqip etmege devam etecektir», – dep qayd ete Türkiye tış işler nazirligi.
Bundan evel Türkiye Rusiye arbiyleri tarafından ATR qırımtatar telekanalında yanvar 26-da keçirilgen tintüvni takbih etken edi.
Ahtem Çiygoz yanvar 29-da yaqalandı. Rusiye Taqiqat komitetiniñ resmiy vekili Vladimir Markin bildire ki, Çiygoznı «kütleviy numayışnı teşkil etüv ve iştirak etüvde» şekleyler.
Onıñ aytqanına köre, 2014 senesi fevral 26-da Aqmescitteki Qırım parlamentiniñ binası yanında keçirilgen narazılıq aktsiyası aqqında laf kete.
Aqmescitniñ Kiyev rayon mahkemesi Çiygoznı 2015 senesi fevral 19-na qadar apiste qaldırdı.
Qırımtatar Milliy Meclisiniñ reisi Refat Çubarov Çiygoznıñ yaqalanmasını izaatlap, Qırımda qırımtatar milliy areketiniñ faallerine yapılğan basqınıñ yañı basamağı başlanğanını ayttı.
