Ukraina Rusiyeden Qırımtatar Milliy Meclis reisiniñ muavini Ahtem Çiygoznı azat etmege talap ete. Bu aqqında Ukraina Tış işler nazirliginiñ (MİD) beyanatında aytıla.
«Rusiyeniñ işğalci akimiyetinden Ahtem Çiygoznıñ azat etilmesi, qırımtatarlarğa yapılğan basqı toqtatılması ve Qırım Muhtar Cumhuriyetinde insan aqlarınıñ bozulmaması içün tedbirler keçirilmesini talap etemiz», – dep qayd ete MİD.
Nazirlikni Ahtem Çiygoznıñ yaqalanması, em de ATR qırımtatar telekanalınıñ tintüvi açuvlandırdı. MİD halqara toplulıqnı «qırımtatar halqınıñ taqip etilmesi ve olarğa qarşı yapılğan terror areketleriniñ takbih etilmesine» çağırdı.
«Bu rezaletli vaqia işğal etilgen Qırım Muhtar Cumhuriyetinde Rusiye Federatsiyasınıñ cinayetçi siyasetiniñ devamı ola, olar işğalge qarşılıq köstergen qırımtatar faallerini ve Ukraina ile bağlı olğan er şeyni qorquzacaq olalar», – aytıla beyanatta.
Ahtem Çiygoz yanvar 29-da yaqalandı. Rusiye Taqiqat komitetiniñ resmiy vekili Vladimir Markin bildire ki, Çiygoznı «kütleviy numayışnı teşkil etüv ve iştirak etüvde» şekleyler.
Onıñ aytqanına köre, 2014 senesi fevral 26-da Aqmescitteki Qırım parlamentiniñ binası yanında keçirilgen narazılıq aktsiyası aqqında laf kete.
Aqmescitniñ Kiyev rayon mahkemesi Çiygoznı 2015 senesi fevral 19-na qadar apiste qaldırdı.
Qırımtatar Milliy Meclisiniñ reisi Refat Çubarov Çiygoznıñ yaqalanmasını izaatlap, Qırımda qırımtatar milliy areketiniñ faallerine yapılğan basqınıñ yañı basamağı başlanğanını ayttı.
