Link açıqlığı

Çiygoznıñ ömür arqadaşı: tintüv vaqtında meni aqaretlediler ve aşaladılar


Meclis reisiniñ muavini Ahtem Çiygoznıñ Bağçasaraydaki evinde keçirilgen tintüv neticeleri, 2015 senesi yanvar 30 künü

Rusiye uquq qoruyıcıları Qırımtatar Milliy Meclisiniñ reis muavini Ahtem Çiygoznıñ Bağçasaraydaki evinde tintüv keçirip, onıñ apayı Elmira Ablâlimovağa «qaba» davrandılar. Bunı Ablâlimovanıñ özü Qırım.Aqiqatqa bildirdi.

«Olar pek erte keldiler, tahminen saat 7.15. Men köpek avuldamasından ve araba qapınıñ tasırdamasından uyandım. Ahtem Çiygozğa qarşı açılğan cinaiy iş ile bağlı vesiqa ve elektron taşıyıcılarnıñ alınması, tintüv keçirilmesi aqqında qararnı seslendirdiler. Tahminen 10 insan er daim yanımda edi. Tışarıda bulunğan mahsus hızmet bar edi, evge aqrabamızdan iç kimseni kirsetmediler, men bir özüm edim. Tintüv utanmaz, arsız ve qaba bir şekilde keçirildi. Eki hadim, olardan biri – Qırım Cumhuriyeti İçki işler nazirliginiñ üyken vekâletlisi Aleksey Malivanets ve Rusiye Federal havfsızlıq hızmetiniñ üyken hadimi Andrey Kudaşov utanmayıp, meni insan, vatandaş, qırımtatarı, qadın ve islâm dinini kütken bir insan olaraq aşaladılar», – dep ayttı Elmira Ablâlimova.

Onıñ bildirgenine köre, o, taqiqatçığa bu adamlarnı tenbilemege rica etti. Lâkin onıñ areketleri olarnı bunı yapmağa zorlay degen cevap berildi.

Bundan ğayrı, Ablâlimovanıñ fikirince, Rusiye Cinaiy-protsessual kodeksiniñ tintüv vaqtında şaatlarnıñ qullanmasında bozuvlar oldı.

«Men şaat olaraq qomşularnı davet etmege talap etsem de, maña eki tanış olmağan insannı tanıttılar. Birisi Qarasuvbazar rayonından, ekincisi de Aqmescitten eken. Soyadı Lotkovskiy olğan şaat er kesniñ adını bile edi, demek ki, bu adam meraqlanğan bir şahıs edi. Bundan ğayrı, o, ğayet faal olıp, tehnikanı baqtı, tellerni qarıştıra edi, bu kene de onıñ alâqasını tasdıqlay, lâkin Rusiye Federatsiyasınıñ Cinaiy-protsessual kodeksine binaen, şaat olaraq alâqası olmağan bir insan olmalı», – dep ayta Çiygoznıñ apayı.

Onıñ bildirgenine köre, tintüv vaqtında bir av patronı tapıldı. Lâkin onıñ bu patrondan haberi yoq. Bundan ğayrı, qorantanıñ şahsiy parası olğan 2 biñ dollar ve 100 euro, bundan ğayrı, Tataristan ziyaretinde ediye etilgen hatıralıq para, bilgisayar tehnikası ve şahsiy telefonlar alındı. Evniñ mal-mülkine büyük zarar ketirildi.

«Tabannı aldılar, merdiven, ev bosağasını qırdılar, skemlelerni qırdılar. Tataristan ziyaretinde ediye etken hatıralıq paranı bile aldılar», – dedi Ablâlimova. Onıñ aytqanına köre, tintüv protokolı ile adliyecisine muracaat etecek.

XS
SM
MD
LG