Yerli saatke köre saat 15-te Aqmescitniñ «Fiolent» stadionında başlanacaq olğan Muhammed peyğamberge yapılğan karikaturalarğa qarşı avtoyürüş iştirakçileri 30 daqqa keç qaldılar.
Qırım.Aqiqat mühbiriniñ malümatına köre, Qırım paytahtına olar «Noçnıye volki» baykerler klubı ile keldiler. Avtoyürüşte 200 maşina iştirak ete. Bir çoq maşinada qırımtatar, Rusiye ve dagestan milliy bayraqları bar. Maşinalarda peyğamberge olğan sevgi yazıları da mevcut.
«Fiolent» stadionında 100-150 insan toplaştı. Olarnıñ arasında «Devlet şurasınıñ» spiker muavini Remzi İlyasov, Qırım Nazirler şurası «baş naziriniñ muavini» Ruslan Balbek, Dagestan resmiy eyyeti, Qırım müendislik pedagogika universitetiniñ rektorı Fevzi Yakubov, bu aliy oquv yurtunıñ oca ve talebeleri, «Molodaya gvardiya» teşkilâtınıñ vekilleri, «kazaklar birleşmeleri» ve «samooborona» vekilleri buluna. «Bizler dagestan qardaşlarımıznı Qırımda qarşılaymız» levhası asıldı. Stadionda bulunğanlar namaz qılmağa planlaştıralar.
Uquq qoruyıcı organlarnıñ bir qaç hadimi nizamnı nezaret etmekte. Kirişte metallik ramkalar tura.
Malüm olğanı kibi, Dagestanda «Rusiye peyğamberlerni izzet ete ve adamlarnı ürmet ete!» şiarı altında regionlarara aktsiya-avtoyürüş başlandı. Onıñ iştirakçileri Muhammed peyğamberge yapılğan karikaturalarğa qarşı çıqalar.
Teşkilâtçılarnıñ qayd etkenine köre, aktsiya maqsadı – musulman ummetiniñ birligini köstermek, Rusiye regionları arasında eyi qomşulıq alâqalarını pekitmektir.
Marşrut Groznıy, Magas, Vladikavkaz, Nalçik, Stavropol, Krasnodar, Keriç ve Aqmescitten keçmekte.
