Qırımtatar Milliy Meclis reisi muavininiñ evinde taqiqat tedbirleri 9 saat devam etmekte.
Qırım.Aqiqat mühbiriniñ malümatına köre, Taqiqat komitetiniñ hadimleri bilgisayar tehnikasını alıp, maşinağa yüklediler.
Bu daqqaları evde yalıñız Ahtem Çiygoznıñ apayı Elmira Ablâlimova buluna.
Yaqalanğan Çiygoznıñ aqrabasını ve apayınıñ anasını içerige almaylar. Silâlı adamlar ev etrafını sarıp aldılar.
Tintüv aqqında haber alıp evniñ yanına kelgen qomşu, Meclis azaları ve faallerniñ çoqusı ketti. Qalğanları evniñ yanında qalıp, taqiqat tedbirleriniñ neticelerini bekleyler.
Uquq qoruyıcılar vaziyetni izaatlamay.
Yanvar 30-da sabadan berli Çiygoznıñ Bağçasaraydaki evinde tintüv keçirile. OMON hadimleri ev etrafını sarıp aldılar. İçeride Çiygoznıñ apayından ğayrı başqa bir kimse yoq. Uquq qoruyıcılar vaziyetni izaatlamay.
Ahtem Çiygoz yanvar 29-da yaqalandı. Rusiye Taqiqat komitetiniñ resmiy vekili Vladimir Markin bildire ki, Çiygoznı «kütleviy numayışnı teşkil etüv ve iştirak etüvde» şekleyler.
Onıñ aytqanına köre, 2014 senesi fevral 26-da Aqmescitteki Qırım parlamentiniñ binası yanında keçirilgen narazılıq aktsiyası aqqında laf kete.
Aqmescitniñ Kiyev rayon mahkemesi Çiygoznı 2015 senesi fevral 19-na qadar apiste qaldırdı.
Qırımtatar Milliy Meclisiniñ reisi Refat Çubarov Çiygoznıñ yaqalanmasını izaatlap, Qırımda qırımtatar milliy areketiniñ faallerine yapılğan basqınıñ yañı basamağı başlanğanını ayttı.
