Qırımtatarlarğa yapılğan basqı Rusiye prezidenti Vladimir Putinniñ faşist Almaniyada olğan Adolf Hitlerniñ usullarını qullanğanını isbatlay, dep tüşüne Qırımtatar Milliy Meclisiniñ reisi Refat Çubarov.
Böyle bir fikirni o, Kiyevdeki matbuat konferentsiyasında seslendirdi, dep haber ete Qırım.Aqiqat mühbiri.
«Putin – zemaneviy Gitlerdir. Bu adamğa daa ne ayta bilem ki, ömür boyu qırımtatarlarnıñ Qırımğa avdet olması oğrunda küreşken Mustafa Cemilev şimdi Qırımğa kirip olamay. İsmet Yüksel, men, sovet lagerlerinde oturğan Sinaver Kadırovğa da Qırımğa kiriş yasaq etildi», – dep ayttı Meclis reisi.
Çubarovnıñ aytqanına köre, Rusiye tarihınıñ nevbetteki saifesi Sibirde islâ lagerleri olması mümkün, anda Rusiye akimiyetiniñ nezareti altında olğan yerlerde yaşağan er bir adam oğray bile.
Rusiye tarafından işğal etilgen Qırımda – qırımtatar faalleri ve Meclis azalarına basqınıñ yañı basamağı başlandı.
Yanvar 26-da arbiyler ATR qırımtatar telekanalına kelip, tintüv keçirip başladılar. Alıp barıcı yayınğa çıqıp, olarnıñ maqsadı bir yıl evelsi, 2014 senesi fevral 26-da, Qırım parlamentiniñ binası yanında keçirilgen miting videolarını almaqtır, dep ayttı.
Ahtem Çiygoz yanvar 29-da yaqalandı. Rusiye Taqiqat komitetiniñ resmiy vekili Vladimir Markin bildire ki, Çiygoznı «kütleviy numayışnı teşkil etüv ve iştirak etüvde» şekleyler.
Onıñ aytqanına köre, 2014 senesi fevral 26-da Aqmescitteki Qırım parlamentiniñ binası yanında keçirilgen narazılıq aktsiyası aqqında laf kete.
Aqmescitniñ Kiyev rayon mahkemesi Çiygoznı 2015 senesi fevral 19-na qadar apiste qaldırdı.
Yanvar 30-da sabadan berli Çiygoznıñ Bağçasaraydaki evinde tintüv keçirile. OMON hadimleri ev etrafını sarıp aldılar.
