Qırımnıñ qıtaiy Ukraina ile memuriy sıñırda Çonğar noqtası rayonında uzun bir çuqurnı qazalar. Yarımada tarafından qazalar. Bir çoq tehnika çalışa.
Bunı vaqia şaatı Tsentr jurnalistskih rassledovaniy haber agentligine bildirdi.
Onıñ aytqanına köre, çuqurnı Qırım çıqışında soldan qazalar, tahminen 500 metr qazıldı.
«Dört büyük ekskavator, eki büyük 40 tonnalıq samosval, adamlar körüne. Uzaqtan adiy ya da arbiy adamlar añlamaq zordır. Çuqur qazıp, topraqnı tarlağa alıp keteler», – dep ayta şaat.
Topraqnı kim ve nasıl bir maqsat ile qazğanını ögrenip olamadıq. Erkekniñ yanına bir insan kelip, «başqalarnıñ işine burnunı tıqmamağa» tevsiye etti.
«Adiy urbada bir insan kelip, foto ve video çıqarmaq yasaqtır, dep ayttı. Bütün apparaturanı tutıp alacaqlar, videoregistratorlarnı bile», – dep tarif etti şaat.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
