Qırımtatar Milliy Meclisi yaqalanğan Ahtem Çiygoznıñ işinde bir de bir müsbet deñişmeler olacağına inanmayıp, onı 10 yılğa qadar azatlıqtan marum eteceklerini red etmeyler.
Bunı Qırımtatar Milliy Meclisiniñ reisi Refat Çubarov Kiyevdeki matbuat konferentsiyasında bildirdi, dep haber ete Qırım.Aqiqat mühbiri.
«Özüni Qırım prokurorı olaraq tanıtqan kişi Ahtem Çiygoz on yılğa qadar apiske alına bile, dep ayttı, ve olar bunı yapacaqlardır. Eñ yaqın vaqıtta Ahtem Çiygoz yerini Poklonskaya almasını isteyim», – dedi Çubarov.
Onıñ aytqanına köre, qırımtatarlarğa yapılğan basqığa, şu cümleden Çiygoznıñ yaqalanmasına qarşı areket etmek içün dünya toplulığı Rusiye istilâsı ile küreş içün büyük tedbirler keçirmeli.
Çubarovnıñ bildirgenine köre, yaqalanğan Çiygoznıñ adliyecisi bar, ve İnsan aqları Ukrain Helsinki gruppasınıñ vekilleri yardım etmege azırlar.
Ahtem Çiygoz yanvar 29-da yaqalandı. Rusiye Taqiqat komitetiniñ resmiy vekili Vladimir Markin bildire ki, Çiygoznı «kütleviy numayışnı teşkil etüv ve iştirak etüvde» şekleyler.
Onıñ aytqanına köre, 2014 senesi fevral 26-da Aqmescitteki Qırım parlamentiniñ binası yanında keçirilgen narazılıq aktsiyası aqqında laf kete.
Aqmescitniñ Kiyev rayon mahkemesi Çiygoznı 2015 senesi fevral 19-na qadar apiste qaldırdı.
Yanvar 30-da sabadan berli Çiygoznıñ Bağçasaraydaki evinde tintüv keçirile. OMON hadimleri ev etrafını sarıp aldılar. İçeride Çiygoznıñ apayından ğayrı başqa bir kimse yoq. Uquq qoruyıcılar vaziyetni izaatlamay.
