Rusiye akimiyetiniñ yaqalanğan Qırımtatar Milliy Meclis reisiniñ muavini Ahtem Çiygozğa nisbeten qabaatları olmaycaq bir şey.
Bu şekilde Ukraina Yuqarı Radasınıñ insan aqlarından vekâletlisi Valeriya Lutkovskaya Kiyevdeki matbuat konferentsiyasında qırımtatar milliy areketi iştirakçisiniñ yaqalanmasına qıymet kesti, dep haber ete Qırım.Aqiqat.
«Bu uquqiy sürrealizm, başqaca aytıp olamayım. Ukrainada, Ukraina qanunlarına köre, bu insannıñ barışıq numayış aqqı bar edi», – dedi Lutkovskaya.
Onıñ aytqanına köre, Rusiye arbiyleri Ukraina Anayasası belgilegen aqqlarından faydalanğan adamnı yaqaladı.
«Menimce, işğalci akimiyet yalıñız Ukraina milliy qanunları degil, halqara qanunlarnı da ürmet etmegenini isbatladı», – dedi o.
Ukrain ombudsmeni bergen malümatına köre, Meclis reis muavininiñ yaqalanması boyunca şikâyet İnsan aqları Avropa mahkemesine yollanılacaq.
Ahtem Çiygoz yanvar 29-da yaqalandı. Rusiye Taqiqat komitetiniñ resmiy vekili Vladimir Markin bildire ki, Çiygoznı «kütleviy numayışnı teşkil etüv ve iştirak etüvde» şekleyler.
Onıñ aytqanına köre, 2014 senesi fevral 26-da Aqmescitteki Qırım parlamentiniñ binası yanında keçirilgen narazılıq aktsiyası aqqında laf kete.
Aqmescitniñ Kiyev rayon mahkemesi Çiygoznı 2015 senesi fevral 19-na qadar apiste qaldırdı.
Yanvar 30-da sabadan berli Çiygoznıñ Bağçasaraydaki evinde tintüv keçirile. OMON hadimleri ev etrafını sarıp aldılar. İçeride Çiygoznıñ apayından ğayrı başqa bir kimse yoq. Uquq qoruyıcılar vaziyetni izaatlamay.
