«Sebat» cemaat teşkilâtı idaresiniñ azası, topraq «narazılıq meydanlarınıñ» azası Seydamet Gemeci uquq qoruyıcı organlar hadimleriniñ qanunsız areketlerine narazılıq bildirmek içün açlıqnı ilân etti. Cumaaqşamı künü, yanvar 29-da, mahkeme onı eki ayğa apiske aldı.
Gemeciniñ açlığı aqqında Qırımnıñ strategik tedqiqler İnstitutınıñ Rusiye Federatsiyası reberligine ve arbiy hızmetlerine yollağan mektübinde aytıla.
«Yaqalağanda Rusiye qanunları bozulğan edi. S.Gemecige nisbeten belgilengen apis cezası kibi ciddiy bir ceza sebepleri aydınlatılmadı. Seydamet Gemeci uquq qoruyıcı ve nezaret organlarğa kendi ve «Sebat» cemaat teşkilâtınıñ faaliyeti aqqında er daim malümat bere edi. Qırım uquq qoruyıcı organlarınıñ hadimleri yapqan qanunsız areketlerge narazılıq köstermek içün Seydamet Gemeci açlıqnı ilân etti», – aytıla mektüpte.
Muracaatta qayd etile ki, «Seydamet Gemeciniñ yaqalanması oña ve «Sebat» cemaat teşkilâtına memuriy ve ruhiy basqı yapmaq içün Qırım akimiyeti tarafından teşkil etildi».
İnstitut reberligi bunıñnen bağlı acele qarar alınmasını ve, muracaatta yazılğanı kibi, «Rusiyeniñ qırımtatar vatanperverlerine büyük basqı yapılmasını» toqtatmağa çağıra.
İşbu mektüp Rusiye prezidenti Vladimir Putin, Rusiye Baş prokurorı, Federal havfsızlıq hızmeti ve İçki işler nazirliginiñ yolbaşçıları, Rusiye Devlet Dumasınıñ reisi ve diger Rusiye memurlarına yollanıldı.
Qırım uquq qoruyıcıları «Sebat» cemaat teşkilâtı idaresiniñ azası, topraq «narazılıq meydanlarınıñ» faali Seydamet Gemecini yanvar 28-de yaqaladılar. «Sebat» idare azası Fazıl İbraimovnıñ malümatına köre, yaqalav sebebi teleyayınında aytqanları oldı.
Cumaaqşamı künü, yanvar 29-da, mahkeme Gemecini eki ayğa apiske aldı. Faalniñ imayesi mahkeme qararına apellâtsiyanı azırlay.
