Link açıqlığı

Saatnıñ esas haberi

Meclis reis muavininiñ evinde keçirilgen tintüv altı saat devam etmekte


Qırımtatar Milliy Meclisiniñ reis muavininiñ evinde arbiyler altı saat devamında tintüv keçireler.

Qırım.Aqiqat mühbiri bildire ki, Ahtem Çiygoznıñ apayınıñ anası evniñ yanına kelip, qızına keçecek oldı. Lâkin OMON hadimleri buña izin bermediler.

Uquq qoruyıcılar vaziyetni izaatlamaylar.

Ahtem Çiygoznıñ evinde tintüv yanvar 30-da yerli saatke köre saba saat 7-lerde başlandı. Taqiqat tedbirleri Rusiye Federatsiyası Cinaiy kodeksiniñ 212-nci maddesi 1-inci qısmı boyunca cinaiy iş («kütleviy numayışlarnıñ teşkil etilmesi») çerçivesinde keçirile.

Ahtem Çiygoz yanvar 29-da yaqalandı. Rusiye Taqiqat komitetiniñ resmiy vekili Vladimir Markin bildire ki, Çiygoznı «kütleviy numayışnı teşkil etüv ve iştirak etüvde» şekleyler.

Onıñ aytqanına köre, 2014 senesi fevral 26-da Aqmescitteki Qırım parlamentiniñ binası yanında keçirilgen narazılıq aktsiyası aqqında laf kete.

Aqmescitniñ Kiyev rayon mahkemesi Çiygoznı 2015 senesi fevral 19-na qadar apiste qaldırdı.

Qırımtatar Milliy Meclisiniñ reisi Refat Çubarov Çiygoznıñ yaqalanmasını izaatlap, Qırımda qırımtatar milliy areketiniñ faallerine yapılğan basqınıñ yañı basamağı başlanğanını ayttı.

XS
SM
MD
LG