Link açıqlığı

Tünevin yaqalanğan Qırımtatar Milliy Meclis reisiniñ muavini Ahtem Çiygoznıñ Bağçasarayda yerleşken evine onıñ tuvğanları, yaqınları kele. Mında yanvar 30 künü sabadan uquq qoruyıcı organları tarafından tintüv keçirile.

Qırım.Aqiqat mühbiri aytqanı kibi, mında tahminen yigirmi insan toplandı. Evge kimseni kirsetmeyler, içeri yalıñız Çiygoznıñ apayı – Elmira buluna.

Şimdi Çiygoznıñ evi yanında bulunğan Bağçasaray rayonınıñ sabıq yolbaşçısı İlmi Ümerovnıñ malümatına köre, sabadan evge silâlı insanlar, Taqiqat komiteti, Federal havfsızlıq hızmeti ve prokuratura hadimleri ile beyaz «Gazel» kelip çıqtı.

«Olarnıñ tam raqamını aytmağa qıyın, men mında kelgende, tintüv endi başlanğan edi», – dey Ümerov.

Bağçasarayda yerleşken Çiygoznıñ evinde tintüv saba saat 7-de başlandı.

Taqiqat tedbirleri Rusiye Federatsiyası Cinaiy Kodeksiniñ 212-nci madde, 1-nci qısmı («kütleviy numayışnı teşkil etüv») boyunca keçirile.

Ahtem Çiygoznıñ evi yanında onıñ özü yolbaşçılıq etken Bağçasaray regional meclisiniñ vekilleri toplaştı.

Aqmescitniñ Kiyev rayon mahkemesi Qırımtatar Milliy Meclisiniñ reis muavini Ahtem Çiygoznıñ cezasını belgilep, onı 2015 senesi fevral 19-na qadar apiske almağa qarar aldı

Ahtem Çiygoz yanvar 29-da yaqalandı. Rusiye Taqiqat komitetiniñ resmiy vekili Vladimir Markin bildire ki, Çiygoznı «kütleviy numayışnı teşkil etüv ve iştirak etüvde» şekleyler.

Onıñ aytqanına köre, 2014 senesi fevral 26-da Aqmescitteki Qırım parlamentiniñ binası yanında keçirilgen narazılıq aktsiyası aqqında laf kete.

Qırımtatar Milliy Meclisiniñ reisi Refat Çubarov Çiygoznıñ yaqalanmasını izaatlap, Qırımda qırımtatar milliy areketiniñ faallerine yapılğan basqınıñ yañı basamağı başlanğanını ayttı.

XS
SM
MD
LG