Avropa Şurasınıñ Parlament Assambleyası Rusiyeni yaqalanğan ukrain rejissöri Oleg Sentsovnı azat etmege çağırdı. Bu aqqında cumaaqşamı künü, yanvar 29-da, PACE tarafından qabul etilgen Avropada matbuat serbestligi rezolütsiyasında aytıla, – dep haber ete RBK-Ukraina.
«Assambleya qanunsız alda işğal etilgen Qırımda ukrain rejissöri Oleg Sentsovnıñ apiske alınmasını ve onıñ azapları aqqında esabatlarnı takbih etip, Rusiye akimiyetini onı acele sürette azat etmege çağıra. İşğal etilgen Qırımda mustaqil kütleviy haber vastalarınıñ taqip etilmesi, şu cümleden ATR telekanalında keçirilgen tintüv, Avropada tanılmaz», – aytıla vesiqada.
Rusiye Federal havfsızlıq hızmetiniñ hadimleri Oleg Sentsov, Aleksey Çirniy ve Gennadiy Afanasyevni terroristik areketler, terakt azırlanması ve silâ ile qanunsız qullanuvda qabaatlap, 2014 senesi mayıs ayında Aqmescitte yaqaladı ve Moskvağa alıp kettiler. Çirniy ve Afanasyev yaqalanğan soñ qabaatlı olğanlarını tanıdılar. Kolçenko terrorizmge alâqası olmağanını bildire. İşniñ daa dört şahsı qıdıruvğa ilân etildi.
Dekabr 26-da Moskvanıñ Lefortovo mahkemesi Sentsovnıñ apis müddetini 2015 senesi aprel 11-ne qadar arttırdı.
ATR qırımtatar telekanalınıñ muarririyetinde tintüv olıp keçti. «Politsiyanıñ» malümatına köre, bu adım 2014 senesi fevral 26-da Aqmescitteki Qırım parlamentiniñ binası yanında ötkerilgen miting ile bağlı.
