İşğal etilgen Qırımnıñ Yuqarı mahkemesi birinci basamaq mahkemesiniñ qararını lâğu etmedi. Oña binaen, «Qırım» Fondu» hayriye teşkilâtı 4,5 million rublelik para cezasını, onıñ yolbaşçısı Riza Şevkiyev ise 350 biñ rublelik para cezasını tölemeliler. Bunı «Krım Media» haber ete.
«Qırım» fondunıñ vekili Cemil Temişev bildirdi ki, fond İnsan aqları Avropa mahkemesinde işbu qarardan şikâyet etecek.
«Bizler qabul etilgen qarar ile razı degilmiz, bizim fikirimizce, mahkeme bu işke ayırım yapıp yanaşa. Bu siyasiy sımarış, onıñ maqsadı – fondnı büyük para cezaları vastasınen boğıp, ileride yoq etmektir», – dep ayttı «Qırım» fondunıñ temsilcisi Cemil Temişev.
Malüm ki, yanvar 27-de olıp keçken mahkeme toplaşuvında mahkemeci işni Qırımnıñ üç devlet tilinden biri qırımtatarca baqmağa istemedi.
Sentâbr 16-da Rusiye Federal havfsızlıq hızmeti ve Taqiqat komitetiniñ hadimleri Meclis binasında tintüv keçirdiler. «Qırım» fondunıñ reberi bildire ki, tehnika, bir qaç diniy risale, em de Ukraina halq deputatı Mustafa Cemilevniñ şahsiy eşyaları alınğan edi.
Ertesi künü mahkeme temsilcileri fondnıñ mal-mülki ve bütün esaplarını tevqif ettiler. Mahkeme temsilcileri kelgende binada adamlar bar edi, olarnı 50 biñ rublelik icra bergisini ödemege zorladılar.
