Link açıqlığı

İşğal etilgen Qırımda Aqmescitniñ Turetskaya soqağındaki Merkeziy rayon mahkemesi yaqalanğan qırımtatar faali, Qırımtatar Milliy Meclisiniñ liderlerinden biri Ahtem Çiygoznıñ cezası aqqında meseleni baqmaqtan vazgeçti.

Qırım.Aqiqat mühbiri bildire ki, Ahtem Çiygoznı yaqalap, Aqmescitniñ Kiyev rayon mahkemesine ketirdiler, lâkin birazdan beyaz «Gazel» mikroavtobusına oturtıp, Aqmescitniñ Merkeziy rayon mahkemesine alıp kettiler.

Anda Ahtem Çiygoznı bir saat tutıp, Kiyev rayon mahkemesine alıp kettiler.

Qırım.Aqiqat mühbiri bildire ki, yaqalanğan Ahtem Çiygoz ile maşina mahkeme azbarından çıqqanda onıñ apayı Elmira «Ahtem! Ahtem!» qıçırıp, maşinanıñ artından çaptı. Lâkin maşina pek tez keçti, ve qadın çetke çekilmege mecbur oldı.

Qırımtatar Milliy Meclisiniñ reis muavini Nariman Celâl Qırım.Aqiqat mühbirine bildirdi ki, şimdi yaqalanğan Çiygoznı tekrar Aqmescitniñ Kiyev rayon mahkemesine alıp keteler.

«Aqmescitniñ Merkeziy mahkemesi Çiygozğa nisbeten mahkeme keçirmek olarnıñ aqqı olmağanını bildirdi. Onı tekrar Kiyev rayon mahkemesine alıp kettiler. Biz de anda ketemiz. Eminmiz, Ahtem Çiygoznı yaqalaycaqlar. Bu qırımtatatar areketiniñ faallerini taqip etmesiniñ devamıdır», – dep qayd etti Nariman Celâl.

Malüm ki, işğal etilgen Qırımda yaqalanğan Qırımtatar Milliy Meclisiniñ liderlerinden biri Ahtem Çiygoznı Aqmescitteki Turetskaya sokağındaki Merkeziy rayon mahkemesine ketirdiler. Mında onıñ cezası belgilenmek kerek edi.

Ahtem Çiygoz yanvar 29-da yaqalandı. Rusiye Taqiqat komitetiniñ resmiy vekili Vladimir Markin bildire ki, Çiygoznı «kütleviy numayışnı teşkil etüv ve iştirak etüvde» şekleyler.

Onıñ aytqanına köre, 2014 senesi fevral 26-da Aqmescitteki Qırım parlamentiniñ binası yanında keçirilgen narazılıq aktsiyası aqqında laf kete.

Qırımtatar Milliy Meclisiniñ reisi Refat Çubarov Çiygoznıñ yaqalanmasını izaatlap, Qırımda qırımtatar milliy areketiniñ faallerine yapılğan basqınıñ yañı basamağı başlanğanını ayttı.

XS
SM
MD
LG