Rusiye Federal havfsızlıq hızmeti (FSB) ukrain uçucısı Nadejda Savçenkoğa qarşı qanunsız alda sıñırdan keçüv boyunca cinaiy iş açtı. Nadejdanı ise SİZOnıñ tibbiy sanitar bölügine keçirdiler, – dep haber ete RBK neşiri.
Nadejda Savçenkoğa qarşı daa bir qabaat peyda olğanını onıñ adliyecisi İlya Novikov da bildirdi.
«Yaramay haberler. FSB Nadejda Savçenkoğa qarşı qanunsız alda sıñırdan keçüv boyunca cinaiy iş açtı. Cinaiy kodeksniñ 322-nci maddesi», – dedi adliyeci.
Neşirniñ malümatına köre, Savçenko açlıq tutıp, pek yazğan. Bu sebepten onı SİZOnıñ «Matrosskaya tişina» tibbiy sanitar bölügine yerleştirdiler.
«Rusiyeniñ Cezalarnı yerine ketirüv federal hızmeti (FSİN) Nadejda Savçenkonıñ belli bir müddet devamında aşamağanını köz ögüne alıp, onı qoşma tibbiy teşkerüv ve nezaret etilmesi içün tibbiy müessisege yollamağa qarar aldı. Şimdi Savçenkonıñ sağlığı «bir qarardır», – dep bildire Rusiye FSİN matbuat hızmeti.
«O, er daim ekimlerniñ nezareti altında buluna ve kerekli ilâclar ala», – dep haber ete hızmet.
FSİN qayd ete ki, ekimler «Savçenko ile ara-sıra laf ete, açlıqnıñ ola bilecek aqibetlerini añlatıp, ondan vazgeçmege çağıralar».
Rusiye ukrain uçucısı Nadejda Savçenkonı Donbassta Rusiye jurnalistleriniñ ölümine alâqası bar olğanında qabaatlay. O, bunı red ete. Onıñ imayesi dey ki, Savçenkonı esir alıp, Ukrainadan zorlap çıqardılar.
