Link açıqlığı

Çubarov: Ahtem Çiygoznıñ yaqalanması – Qırımdaki basqınıñ yañı basamağıdır


Qırımtatar Milliy Meclisiniñ reisi Refat Çubarov

Qırımda qırımtatar milliy areketiniñ faallerine yapılğan basqınıñ yañı basamağı başlandı, – dep ayttı Qırımtatar Milliy Meclisiniñ reisi Refat Çubarov Facebook saifesinde işğal etilgen Qırımda Ahtem Çiygoznıñ yaqalanmasını izaatlap.

«Gaaga yaqınlaşqanını is etip, Qırım işğalcileri qırımtatarlarğa basqı yapmağa devam eteler. Epiñiz kibi, Ahtem Çiygoz içün qasevetlenem. Kiyevde işdeşlerimnen beraber işğalci akimiyetniñ qırımtatarlarğa yapılğan yañı areketlerni ögrenip, kütleviy haber vastalarında aydınlatmağa tırışamız. Elçihane ve halqara teşkilâtlarnıñ missiya yolbaşçıları ile bağlanamız, bir çoq kanal ve diger resurs jurnalistlerine Ahtem Çiygoznıñ yaqalanmasınen bağlı haberlerde yardım etemiz», – dep qayd etti Refat Çubarov.

«Bir şey belli, – Qırımda qırımtatar milliy areketiniñ faallerine yapılğan basqınıñ yañı basamağı başlandı. Añlaşıla ki, er daim olğanı kibi, esas darbe Meclis ve onıñ azalarına yönelgen», – dedi o.

Qırımtatar Milliy Meclisiniñ reisi qırımlılarnı Ahtem Çiygoznıñ qorantasına qoltutmağa çağırdı.

Berilgen malümatqa köre, işğal etilgen Qırımda yaqalanğan Qırımtatar Milliy Meclisiniñ liderlerinden biri Ahtem Çiygoznı Aqmescitteki Turetskaya sokağındaki Merkeziy rayon mahkemesine ketirdiler. Mında ceza belgilenecek.

Ahtem Çiygoz yanvar 29-da yaqalandı. Rusiye Taqiqat komitetiniñ resmiy vekili Vladimir Markin bildire ki, Çiygoznı «kütleviy numayışnı teşkil etüv ve iştirak etüvde» şekleyler.

Onıñ aytqanına köre, 2014 senesi fevral 26-da Aqmescitteki Qırım parlamentiniñ binası yanında keçirilgen narazılıq aktsiyası aqqında laf kete.

Bundan evel ATR qırımtatar telekanalınıñ muarririyetinde tintüv olıp keçti. «Politsiyanıñ» malümatına köre, bu adım 2014 senesi fevral 26-da Aqmescitteki Qırım parlamentiniñ binası yanında ötkerilgen miting ile bağlı.

XS
SM
MD
LG