İşğal etilgen Qırımda Rusiye Federatsiyası Qara deñiz flotunıñ komandan muavini tayin etildi. Bunı «Krım Media» agentligi Rusiye Qara deñiz flotunıñ matbuat hızmeti bergen malümatına esaslanıp bildire.
Berilgen malümatqa köre, bu vazifege general-leytenant Yuriy Petrov tayinlendi.
Böyle bir buyruq Rusiye prezidenti Vladimir Putin tarafından imzalandı.
«Petrov Yuriy Petroviç 1964 senesi oktâbr 26-da Dnepropetrovsk vilâyetiniñ Nikopol şeerinde dünyağa keldi. 1985 senesi Kiyev aliy arbiy komandanlıq oquv yurtundan mezun oldı, 1994 senesi M.V.Frunze Arbiy akademiyasını bitirdi, 2005 senesi – Rusiye Silâlı quvetleri Baş ştabınıñ Arbiy akademiyasını. Turkestan, Uzaq Şarq, Moskva ve Sibir arbiy bölgelerinde askerlik yaptı. 1986-1988 seneleri Afğanistanda sovetler ordusınıñ sıñırlı köntingent erkânında hızmet etken edi. Qara deñiz flotu komandanınıñ muavini olmazdan evel Rusiye Silâlı Quvetleri arbiy azırlıq Baş idaresiniñ yolbaşçı muavini olğan edi. «General-leytenant» rutbesi 2013 senesi berilgen edi. Eki «Qızıl Yıldız» nişanı, «Qızıl Bayraq», «Arbiy yeñişler» nişanları ile taqdirlengen», – dep yaza neşir.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
