Qırım hastahanelerinde kene de meraqlı bir vaziyet: er bir adam belli bir tibbiy müessisede qayd olmaq içün ariza yazmalı. Böyle bir ariza aqqında ilân Keriçniñ №1 hastahanesinde bar.
«Hastahanede hızmet körmege istegen adamlarnıñ ariza yazması kerek», – aytıla ilânda.
Adamlar sabadan berli sıra alalar. Bazıları dayanamay, qavğalar da ola. Keriçlilerniñ aytqanına köre, bazarertesi künü saba hastahanede ğayet kergin vaziyet üküm sürgen edi: birinci qat qayd olacaq adamlar ile toldı.
«Pek çoq adam bar edi, salon rıqma-rıq toldı», – dep ayttı nefaqacılardan biri Qırım.Aqiqatqa.
Er kün yüzlernen adam qayd olacaq ola. Hastalarnıñ bildirgenine köre, ariza yazmağan olsañ, ekimge kiremezsiñ.
İçtimaiy ağlarnıñ qullanıcıları yaza ki, aynı böyle vaziyet Kefe hastahanelerinde de üküm sürmekte.
Yañı yıldan evel ana-babalar belli bir hastahanede balanıñ baqılması içün ariza yazmaq kerek ediler.
2015 senesi yanvar 1-den itibaren Qırımda Rusiyeniñ sigorta tibbiyeti sisteması çalışıp başladı. Tibbiy yardım yalıñız tibbiy sigortası olğan adamlarğa kösterile. Polis olmasa, yardımnı yalıñız «acele yardım» köstere.
Hastahanelerdeki nevbetler keçken seneniñ soñunda da qayd etilgen edi. Emek añlaşmaları, aydavcı şeadetnameleri ve arbiy biletlerni deñiştirgen qırımlılar bütün kün devamında beklemege mecbur qalğan ediler.
