Smolensk vilâyetiniñ sakinine qarşı Ukrainağa fayda ketirmek maqsadı ile yapılğan devlet hainligi boyunca cinaiy işni açtılar. Svetlana Davıdova 2014 senesi aprel ayında Ukraina elçihanesine muracaatta bulunıp, evine yaqın olğan arbiy bölükte askerler körünmegenini bildirgen edi. Onıñ fikirince, arbiylerni Donetskke yolladılar. Şimdi o «Lefortovo» SİZOsında buluna. Bunı Kommersant bildire.
Yanvar 21-de saat 8:30 Rusiye Federal havfsızlıq hızmetiniñ (FSB) hadimleri Rusiye Federatsiyası Cinaiy kodeksiniñ 275-inci maddesine («Devlet hainligi») köre açılğan №221–601 iş boyunca Svetlana Davıdovanı onıñ evinde yaqaladılar. Bir qaç saat sürgen taqiqat tedbirlerinden soñ FSB hadimleri evdeki bilgisayarlarnı ve bütün cep defterlerini alıp kettiler.
Ertesi künü Svetlana Davıdovanı Moskvağa alıp kettiler. Anda ise Lefortovo rayon mahkemesi onı apiske alıp, «Lefortovo» SİZOsına yolladı. Qadınnıñ yedi balası olğanına bir kimse emiyet bermedi.
FSB malümatına köre, 2014 senesi aprel ayında Svetlana Davıdova eviniñ yanında olğan №48886 arbiy bölükte askerler olmağanını kördi. Bu bölükte Aleksandr Nevskiy nişanınıñ Baş istihbarat idaresiniñ 82-nci ayrı radiotehnik brigadası yerleşmekte.
«Soñra o merkezge barıp, marşrutkada bu bölükte hızmet etken askerlerden birini kördi. Andan olğanını añlamaq zor degil edi: o, yüksek bir sesnen bunı telefon ile tarif etken edi, – dep ayta Svetlananıñ aqayı Anatoliy Gorlov. Erkek telefon ile subetleşip, onı ve diger askerlerni «küçük gruppalar ile adiy urbada Moskvağa yollap, andan yollanmalarğa keteceklerini» aytqan edi».
Ukraina şarqındaki vaziyetni faal sürette örgengen Svetlana Davıdova Donetsk yollanması aqqında laf ketkenini tüşündi.
Aqayınıñ aytqanına köre, bundan soñra Svetlana Davıdova Ukrainanıñ Moskvadaki elçihanesine telefon etip, adamlarnı telükeden qurtarmağa istedi.
2014 senesi sentâbr ayınıñ soñunda Mudafaa nazirligi deputat Dmitriy Gudkovnıñ «Rusiye askerleriniñ Ukrainadaki areketleri» aqqında muracaatına cevap berdi. Mudafaa naziriniñ muavini Nikolay Pankov dedi ki, bu «öşekler» çetel kütleviy haber vastaları tarafından tarqatıla, Rusiye ise Ukrainada «zıddiyet olmasınıñ tarafdarı degil».
