Mahaçkaladan 200-ge yaqın maşina avto yürüşke çıqtı, marşrutnıñ soñ noqtası – Aqmescit. Bunı Dagestannıñ insaf serbestligi ve diniy teşkilâtlar ile munasebet boyunca Komitetiniñ reisi ve yürüşniñ iştirakçisi Suleyman Magomedovğa esaslanıp, TASS bildire.
Magomedovnıñ aytqanı kibi, «Rusiye Peyğamberlerni ürmet ete ve insanlarğa sayğı kostere» adlı regionlarara avto yürüş numayışında Dagestannıñ ükümeti ve başı memuriyetiniñ, Cumhuriyet musulmanları diniy idaresiniñ vekilleri, belli sportçu, jurnalist, cemaat erbapları, studentler iştirak ete.
«Olarnıñ arasında – Cumhuriyet yolbaşçısı ve ükümeti memuriyetiniñ nezaret ve idare, qaparcılıq ile küreş boyunca İdaresiniñ reber muavini Alibeg Aliyev, gençler işleri boyunca nazir Zaur Kurbanov, cumhuriyetniñ beden terbiyesi ve sport boyunca nazir muavini Gaydarbek Gaydarbekov, dünyanıñ boks boyunca sabıq çempionı Sultan İbragimov ve digerleri», – dep qayd etti Magomedov.
Teşkilâtçılar qayd etkeni kibi, numayış maqsadı – memleketniñ musulman ümmetiniñ birligini köstermek, Rusiye regionları arasında namuslı munasebetni saqlamaqtan ibarettir.
Marşrut Groznıy, Magas, Vladikavkaz, Nalçik, Stavropol, Krasnodar, Keriçten keçecek, işbu şeerlerde yerli akimiyet vekilleri ile körüşüvler keçirilecek. Aqmescitte olarnı «Gece börüleri» bayker klubı qarşılaycaq.
Yürüş iştirakçileri yanvar 30 künü Aqmescitke kelip, Qırım musulmanları ile cuma namazını qılacaq olalar.
Numayış teşkilâtçıları cumhuriyetiniñ Cumhuriyet musulmanları diniy idaresi ve Dagestannıñ insaf serbestligi ve diniy teşkilâtlar ile munasebet boyunca Komiteti oldı.
