AQŞ Devlet departamenti Rusiyeni ukrain uçucı Nadejda Savçenko ve diger «ukrain mabüslerini» azat etmege çağırdı. Bunı Devlet departamentiniñ kâtibi Jen Psaki er künlük brifing devamında bildirdi.
«Ukraina parlamentariyi ve arbiy uçucı Nadejda Savçenkonıñ Rusiye tarafından apiste tutulğanından ağır hastalanğanı aqqında haberlerni ögrenip, qasevet etemiz. Savçenko hanım, bulunuv şaraitlerine narazılıq bildirip, dekabr 13-den açlıq tutqanını añlaymız. Savçenko hanım separatistler tarafından 2014 senesi iyün ayında Ukraina şarqında yaqalandı ve Rusiyege teslim etildi. Şunı da qayd etemiz ki, Savçenko hanım Avropa Şurası Parlament Assambleyasında, insan aqları, demokratiya ve qanuniyetke bağışlanğan organnıñ vekili ola. Biz Rusiyeni acele sürette Savçenko hanımnı ve diger ukrain mabüslerini azat etmege ve Minsk añlaşmalarına riayet etmege çağıramız»,– dedi Psaki.
Çarşenbe künü, yanvar 28-de, Avropa Parlament Assambleyası rezolütsiya deñişmelerini qabul etti. Mında Rusiye Federatsiyasından Nadejda Savçenkonı 24 saat içinde azat etmege ve onı Ukraina, ya da üçünci tarafqa teslim etmege talap etile.
Bunıñ ile PACEde Rusiye eyyetini aprel ayına qadar rey berüv aqqından marum ettiler.
Rusiye Assambleyanıñ rezolütsiyasına riayet etmege razı olmadı ve PACE iştiraginden 2015 senesiniñ soñuna qadar vazgeçti.
