Rusiye prezidentiniñ İnsan aqları boyunca şurası baş prokuror Yuriy Çaykağa yarımadanıñ uquq qoruyıcı organları tarafından ATR qırımtatar telekanalına etilgen basqı aqqında malümatnı ögrenmek ricası ile bulundı. Bunı Tsentr jurnalistskih rassledovaniy bildire.
Şura reisi Mihail Fedotovğa ATR baş müdiri Elzara İslâmovadan mektüp keldi. Baş müdir OMON hıhmetçileri ile keçirilgen tintüvni ve arhivniñ tutıp alınuvını telekanalğa etilgen basqı olaraq tanıdı.
«Evel yerli akimiyet ATR telekanalını «muhalif kanal» olğanımızda ya da «aqiqatnı bozıp köstergenimizde» qabaatlay edi. Biz ise professional printsiplerge riayet etip ve qanuniyet çerçivesinden çıqmayıp, yarımadada olıр keçken bütün adiselerni aks etmege tırışa edik. Ve mında müsbet deñişüvler ile bir sırada biz keçici müddet devamında olğan hatalar, meseleler, bazıda yerli akimiyetniñ suistimalı aqqında ayta edik», – denile Elzara İsâlmovanıñ mektübinde.
ATR «yekâne qırımtatar telekanalı» olğanı sebebinden şura reisi Mihail Fedotov Rusiye Federatsiyasınıñ baş prokurorına «Elzara İslâmovanıñ muracaatını baqıp çıqmağa ve alınğan qararlar aqqında haber bermege» avale etti.
