Hersonğa Qırım ve Donbasstan köçip kelgenlerniñ sayısı yaqında artacaqtır. Bugün Hersonda «Cemiyetniñ istiqrarlı inkişafına imkân doğurmaq içün köçip kelgenler ve qabul etken taraflar arasında munasebetniñ inkişafı» mevzusında keçirilgen tögerek masa iştirakçileri bu kibi neticege keldiler, haber ete Qırım.Aqiqat mühbiri.
Tögerek masa Qırım Muhtar Cumhuriyetinde Ukraina Prezidentiniñ Temsilciligi binasında keçirildi. «KrımSOS» leyhasınıñ teşebbüsi ile keçirilgen tedbirde akimiyet ve yerli idare organlarınıñ, cemaat teşkilâtlarınıñ, halqara strukturalarınıñ vekilleri ve Qırım ile Donbasstan mecburen köçip kelgenler iştirak etti.
Mecburen köçip kelgenler ile çalışqan teşkilâtlarnıñ hadimleri öz çıqışlarında qayd etkeni kibi, yaqın zamanda köçip kelgenlerniñ sayısı, hususan Herson vilâyetinde, olduqça artacaqtır.
«Baarde Qırımdan Rusiye ordusına çağıruvdan qaçınmağa itsegen gençlerniñ kelmesini bekleymiz», – dedi «Küreş» qırımtatar medeniy-sport merkeziniñ reis muavini Alim Suleymanov.
Birleşken milletler teşkilâtınıñ qaçaqlar işleri boyunca Yuqarı komissarı İdaresiniñ temsilcisi Yekaterina Gandzük Herson tarafında Donetsk ve Lugansk vilâyetlerinden köçip kelgenlerniñ sayısı işbu regionlarda vaziyet daa da kergin olacağı sebebinden artacağını tüşüne.
Mecburen köçip kelgenlerge rastkelgen meseleler aqqında aytqanda, Hersonğa Lugansktan kelgen «Sofiya» fondunıñ teşebbüs taqımınıñ temsilcisi Sergiy Zadorojnıy üç esas meseleni qayd etti: mesken, munasip işniñ tapıluvı ve yañı müitke alışuv.
Eñ zor meselelerniñ sırasına apishanelerden çıqqan insanlarnıñ Qırım işğalinden soñ vaziyeti ile bağlı meseleni kirsettiler. Şimdi ukrain apishanelerinde tahminen 2,5 biñ qırımlı buluna, 80% veremge hastadır. Bu insanlar yaqın zamanda ya müddetniñ soñuna yetkeni, ya da amnistiya sebebinden azatlıqqa çıqacaq. Vatanda Ukraina vatandaşı pasportını alalmayıp (aks alda olar Qırımğa kiremezler), azat olunğanlar Herson vilâyetine ketmege mecbur. Şimdi regionda pasportnıñ berilmesini 280 insan bekley. Olar şimdi çeşit hayriye teşkilâtlarnıñ esabına yaşay ve olarnıñ anda bulunuvı Herson içün havflı sayıla.
Tögerek masa iştirakçileri Ukrainada devlet strukturaları mecburen köçip kelgenlerniñ meselelerini zaruriy seviyede çezip olamağanını qayd ettiler. Şunıñ içün olarnıñ sayısı artsa, cemaat ve hayriye teşkilâtlarğa yüklenilecek mesüliet daa da büyük olacaqtır.
