Çarşenbe künü, yanvar 28-de, Aqmescitniñ Kiyev rayon mahkemesinde adliyeci Svetlana Sidorkinanıñ qırımlı Aleksandr Kolçenkonıñ Ukraina vatandaşlığını saqlap qalmaq aqqı tanılması aqqında arizası baqıldı. Lâkin mahkeme buña razı olmadı, dep haber ete Qırım.Aqiqat mühbiri.
«Kolçenkonıñ aytqanına köre – o, Rusiye vatandaşlığınıñ qabul etilmesi aqqında ariza yazmadı, lâkin Federal havfsızlıq hızmetiniñ idaresi böyle bir ariza bar olğanını bildire», – dep ayttı maznunnıñ adliyecisi Svetlana Sidorkina.
O, Apellâtsion mahkemege ariza yazıp, Aleksandr Kolçenkonıñ Ukraina vatandaşlığınıñ saqlap qalmasını talap etecek ola.
Hatırlatamız, Qırımda faşizmge qarşı küreşken içtimaiy faal Aleksandr Kolçenko 2014 senesi mayıs ayında Aqmescitte apiske alınğan edi. Onı Moskvadaki «Lefortovo» SİZOsına yolladılar. FSB taqiqatçıları onı, ve Qırımnıñ daa üç sakinini, şu cümleden ukrain rejissöri Oleg Sentsov, tarihçı Aleksey Çirniy ve adliyeci Gennadiy Afanasyevni terroristik areketler, terakt azırlanması ve silâ ile qanunsız qullanuvda qabaatlaylar.
Moskvanıñ Lefortovo rayon mahkemesi 2014 senesi dekabr 25-te qırımlınıñ apis cezasını 2015 senesi aprel 16-na qadar arttırdı.
Kolçenko özüni Ukraina vatandaşı olaraq tanıtsa da, taqiqat onıñ Rusiye vatandaşlığı aqqında aytmağa devam ete.
