Georgiyevskiy S.İ. adına Qırım devlet tibbiy universitetiniñ studentleri yıllardır aliy oquv yurtınıñ rektorı olğan Anatoliy Babaninniñ işten boşatılmasına menfiy qıymet keseler.
Studentlerniñ Qırım.Aqiqat mühbirine bergen malümatına köre, olar Babaninge qoltutmaq içün daa bir narazılıq aktsiyasına çıqmağa azırlar.
«O, yahşı bir rektor edi, universitetke er daim qoltutqan edi, men onıñ işten boşatılmasına qarşı çıqam. Bizler onı qaldırsınlar dep, mitingge çıqıp, Putinge mektüp yazmağa azırmız. Ümüt etem ki, bu sefer bizni eşitecekler», – dep ayttı 2-nci kurs studenti İnna.
Çetel studentleri ise Sergey Doniçniñ aytqanları ve areketlerini tenqit eteler. Onıñ bildirgenine köre, Babaninni işten boşatmaq qararı Qırımnıñ öz başına ilân etilgen baş naziri Sergey Aksönov ve Qırım «spikeri» Vladimir Konstantinov ile körüşüvden soñ qabul etildi.
Tibbiy universitetniñ yañı reberi tibbiy ilimler doktorı, oftalmolog Nana İvanova olacaq. Bundan evel o, oftalmologiya ve otolaringologiya kafedrasınıñ müdiri edi.
Malüm ki, işğal etilgen Qırımda studentler ve ocalar istemese de, Qırım tibbiy universitetini işğalci akimiyet tarafından qurulğan Federal universitet terkibine kirsettiler.
Qırım tibbiy universitetiniñ reberligi Rusiye akimiyetiniñ qararına baqmadan, mustaqil bir aliy oquv yurtı olmağa qarar aldı.
