Qırım «Devlet şurası»nıñ reisi Vladimir Konstantinov yarımada umumiy mobilizatsiyadan qorçalanmağa istegen Ukraina vatandaşlarını qabul etmege azır olğanını bildirdi.
Bunı o, akimiyetke yaqın olğan Krıminform saytına ayttı.
«Prezidentniñ bu mevzuda doğrudan doğru aytqan lafı bar. Rusiye Federatsiyası Ukrainadan arbiy hızmetten qaçınmaq maqsadı ile çıqqan insanlarğa qol tutacaq ve öz toprağında bulunuv müddetini uzatmağa da azır olacaqtır», – dedi Konstantinov.
«Böyle meyil körüne. Qırım da istisna degildir, şunıñ içün, elbette ki, biz böyle insanlarnı qabul etecekmiz», – dedi o.
Konstantinov şunı da qayd etti, arbiy hızmetten qaçınğanlar Rusiye vatandaşlığını ve iş ile bulunuv iznini elde ete bilecek.
Yanvar 20 künü Ukrainada 90 kün devam etecek mobilizatsiya dalğası başlandı.
Evel işğal etilgen Qırım sakinlerini arbiy komissarlıqlarğa çağırmağa başlağan ediler. Mart 16-na qadar kelmegenlerge para cezalarını berecek olalar.
