Link açıqlığı

Qırımtatarlarnıñ milliy yetekçisi Mustafa Cemilev Qırım akimiyeti ATR yekâne qırımtatar telekanalını qapata bilecegi aqqında söz yürüte.

Bunı o Radıyo Svabodağa bildirdi.

«Kanalanı qapata bileler, çünki olar içün bu qozğayıcı bir telekanaldır. Zaman haber yayınları Qırımda olayatqan adiseler aqqında açıq-aydın malümatnı bere. Yasaqlar bar, doğrusı. Olarğa işğal, anneksiya kibi sözlerni qullanmağa olmay. Er vaqıt Meclisni añmağa, Refat Çubarovnı (Meclis reisi, - muar.) köstermege mümkün olmağanı aqqında tenbiyeleyler. Amma olar bunı eteler»,– dedi Cemilev.

«İşğalcilerniñ sabırı soñuna yetkendir, ğaliba. Soñu ne olacaq, bilmeyim. Olar şimdi qırımtatarlarnı bütünley sustırmaq çalışalar, amma buña ise zıt seslenüv kele», – dep qoştı qırımtatarlarnıñ yetekçisi.

Bazarertesi künü, yanvar 26-da, ATR qırımtatar telekanalına silâlı insanlar sürip kirdi. Haberlerniñ acele yayınında alıp barıcı silâlı insanlar Aqmescitte yerleşken ATR qırımtatar telekanalına bir yıl devamında olıp keçken adiselerniñ video malümatını, şu cümleden, fevral 26 künü Qırım parlamenti divarları yanında keçirilgen mitingniñ videosını saqlağan bilgisayar serverini tutıp almaq içün kelgenini bildirdi.

Hatırlatamız, 2014 senesi fevral 26 künü Qırım parlamenti divarları yanında Qırımnıñ ayırıluvına qol tutqanlar ve Ukraina birdemligi tarafdarları arasında muqavemet-mitingi keçirilgen edi. Ekinci tarafnıñ esas qısmı qırımtatarları edi.

Qırım «prokurorı» Natalya Poklonskayanıñ aytqanına köre, tintüv taqiqatçınıñ qararı ile açılğan cinaiy iş çerçivesinde keçirildi.

Ukrain ve halqara teşkilâtları işbu areketlerni qırımtatarlarğa Rusiye ve yerli akimiyet tarafından etilgen nevbetteki basqı olaraq tanıy ve takbih eteler.

XS
SM
MD
LG