Link açıqlığı

İosif Stalinniñ torunı, Yevgeniy Cugaşvili, Rusiye prezidenti Vladimir Putinni tenqit, Ukraina ile cenkni ve Qırım işğalini takbih etti. O, Kremlniñ siyasiy elitasını rusiyelilerni aldatqan «cinayetçiler» olaraq adladı.

Bunı o Daily Mail neşirine bildirdi.

Cugaşvili fikrine köre, Rusiye prezidentiniñ areketlerine «sağlam aqıl» yetişmey ve o, siyasetten kendi itibarı aqqında daa da çoq tüşüne.

«O, ne yapa? Özüne nasıl maqsat qoydı? Bizim tuvğan millet, Ukraina ile aralarımıznı bozdı. Şimdi yetekçilerimiz ne? Bizde aqıllı yolbaşçı yoq, yalıñız cinayetçiler», – dedi o.

Stalinniñ torunı Qırımnıñ işğalini de takbih etti. Onıñ fikrine köre, eger de Rusiyege yarımada pek kerek olsa edi, onı küç ile degil de, yuridik usulları ile qaytarmağa kerek edi.

«Er alda, yarımadanı satın almaq mümkün edi. Nasıldır bir çare tapmağa kerek edi, amma yarımadanı mecburen ayırmağa olmaz da. Şimdi olar Malorossiya aqqında söz yürüteler. Vaqıt deñişti endi. Tışarıda 21-nci asır, yetekçilerimizniñ usulları ise iç deñişmey. Bu ne sebepten ola?», – dep sual qoya Cugaşvili.

2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.

Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.

XS
SM
MD
LG