Qırımtatar milliy areket vetaranlarınıñ şurası uquq qoruyıcılarnı ve yerli akimiyetni tamır halqqa nisbeten qorqutuv usullarını toqtatmağa çağırdı.
Bu aqta Qırım.Aqiqatnıñ elinde olğan Şuranıñ muracaatında aytıla.
Muracaatta qırımtatarlarnıñ milliy yetekçisi Mustafa Cemilevniñ kiriş yasağı, 2015 senesi yanvar 19 künü mayıs 3-de biñlerce qırımtatarları ile Ermeni Bazarda olğan Edem Osmanovnıñ döggenleri, em de yanvar 26 künü ATR qırımtatar telekanalında keçirilgen tintüv aqqında yazıla.
«Biz, qırımtatarlarnıñ tarihiy vatanı – Qırımğa avdet kürеşinde nice manialardan keçken, Devlet havfsızlıq komiteti (KGB), İçki işler halq komissarlığınıñ (NKVD) basqılarını körgen ve adalet oğrunda küreşip, kemlikke boysunmağan milliy areket veteranları, uquq qoruyıcı organlar ve yerli akimiyetni cinaiy areket etmegen Edem Osmanovnı apisten azat etmek, em de dünyada yekâne olğan ATR birinci qırımtatar telekanalınıñ işine keder etmemege çağıramız. Ümüt etemiz ki, ricamız mezkür hızmet ve akimiyet organları tarafından diqqatqa alınır ve amelge keçirilir», – denile muracaatta.
Bazarertesi künü, yanvar 26-da, ATR qırımtatar telekanalına silâlı insanlar sürip kirdi. Haberlerniñ acele yayınında alıp barıcı silâlı insanlar Aqmescitte yerleşken ATR qırımtatar telekanalına bir yıl devamında olıp keçken adiselerniñ video malümatını, şu cümleden, fevral 26 künü Qırım parlamenti divarları yanında keçirilgen mitingniñ videosını saqlağan bilgisayar serverini tutıp almaq içün kelgenini bildirdi.
Hatırlatamız, 2014 senesi fevral 26 künü Qırım parlamenti divarları yanında Qırımnıñ ayırıluvına qol tutqanlar ve Ukraina birdemligi tarafdarları arasında muqavemet-mitingi keçirilgen edi. Ekinci tarafnıñ esas qısmı qırımtatarları edi.
Qırım «prokurorı» Natalya Poklonskayanıñ aytqanına köre, tintüv taqiqatçınıñ qararı ile açılğan cinaiy iş çerçivesinde keçirildi.
Ukrain ve halqara teşkilâtları işbu areketlerni qırımtatarlarğa Rusiye ve yerli akimiyet tarafından etilgen nevbetteki basqı olaraq tanıy ve takbih eteler.
