Yuqarı Radada Ukraina devlet akimiyet organlarındaki Rusiye kütleviy haber vastalarınıñ jurnalistleri ve tehnikiy hadimleriniñ akkreditatsiyasını vaqtınca toqtatmağa teklif etken qarar leyhası qayd etildi.
İşbu vesiqanıñ müellifleri «Petro Poroşenkonıñ bloku» fraktsiyasınıñ halq deputatları İrina Friz ve Bogdan Onufrik olalar, – dep haber ete Radio Svoboda.
Vesiqa metni Yuqarı Rada saytında şimdilik yoq. Berilgen malümatqa köre, qanun leyhası parlamentniñ baqılmasına berildi.
«Petro Poroşenkonıñ bloku» saytınıñ malümatına köre, qararğa binaen, Ukraina havfsızlıq hızmeti Ukrainağa qarşı informatsion cenkte iştirak etken Rusiye kütleviy haber vastalarınıñ cedvelini tizip, olarnıñ hadimlerine berilgen akkreditatsiyanı vaqtınca toqtatmaq kerek.
Akkreditatsiya jurnalistlernen beraber Rusiye kütleviy haber vastalarınıñ prodüser, operator, tehnikiy hadimleri içün toqtatıla. Qanun leyhası Ukraina nazirler şurasına bir ay içinde çetel kütleviy haber vastalarına akkreditatsiya berilmesini belgilemege avale ete.
UHH reis mesleatçısı Markiyan Lubkivskiy bildirdi ki, Ukraina havfsızlıq hızmeti terrorizmge qarşı tedbirler keçirilgen vaqıtta çetel jurnalistlerniñ akkreditatsiyasını Ukraina İçki işler nazirliginde ve Ukraina havfsızlıq hızmetinde yapmağa teklif ete.
