Link açıqlığı

Salı künü, yanvar 27-de, saat 15-lerde, Donetsk vilâyetindeki Svetlodarsk mesken yerinde boyevikler hastahanege «Graddan» atış açtılar. ATO matbuat merkezi bildire ki, hadimler ve hastalar arasında yaralanğanlar bar.

«Terroristlerge Mariupoldeki qanlı drama yetmedi ve olar kerçek betini ve maqsadlarını daa bir kere kösterdiler. Malüm ki, tibbiy müessisege ateş açmaq mümkün degil, lâkin Rusiye tarafından idare etilgen adamlar medeniy qaidelerge boysunmazlar», – aytıla beyanatta.

ATO matbuat merkezi qayd etti ki, yaralanğan adamlar aqqında malümat ögrenile.

Gromadske TV bildire ki, ateşke oğrağan hastahanege Debaltsevoda zarar körgen em adiy, em de arbiy adamlarnı ketireler.

Neşirniñ malümatına köre, hastahane qısmen viran etildi, pencereler qırıldı, ameliyathane de zarar kördi.

Malüm olğanı kibi, yanvar 24-te Mariupolde mesken kvartallarğa açılğan ateş neticesinde 30 kişi elâk oldı, 100 adam yaralandı. OSCE mahsus monitoring gruppası bergen malümatına köre, ateş «DNR» birleşmesi zapt etken yerden açılğan edi.

Ukraina Yuqarı Radası halqara teşkilâtlarğa «LNR» ve «DNR» birleşmeleriniñ terroristik teşkilâtları, Rusiyeniñ ise istilâcı-memleket olaraq tanılması aqqında muracaatnı qabul etti.

226 rey kerek olsa da, 271 halq deputatı buña qoltuttı.

XS
SM
MD
LG