Link açıqlığı

Saatnıñ esas haberi

Mahkeme «Qırım» Fondunıñ işni qırımtatarca baqmaq ricasını red etti


Qurultay Merkeziy saylav komissiyasınıñ reberi Zair Smedlâyev
Qurultay Merkeziy saylav komissiyasınıñ reberi Zair Smedlâyev

İşğal etilgen Qırımnıñ Yuqarı mahkemesinde yanvar 27-de «Qırım» Fondu» hayriye teşkilâtınıñ işi boyunca daa bir toplaşuv keçirildi. İşni Qırımnıñ devlet tillerinden biri olğan qırımtatar tilinde baqmaq muracaatına baqmadan, mahkemeci bunı red etti.

«Mahkemeci Timoşenko fondnı temsil etken taraf rusça bilgenine esaslanıp, «başqa tilni qullanmağa acet olmağanını» ayttı», – dep bildirdi qırımtatar faali, Qurultay Merkeziy saylav komissiyasınıñ reberi Zair Smedlâyev Qırım.Aqiqat mühbirine.

Smedlâyevniñ fikirince, mahkemeciniñ bu munasebeti em Qırım anayasasına, em de Rusiye prezidenti Vladimir Putin aytqan Qırımnıñ tamır halqı qırımtatarlarnıñ tiliniñ «devlet tili olaraq inkişaf şartları ve qoltutuvına» zıt kele.

«Bu bizim anayasa aqqımızdır. Tarafnıñ talabı ile mahkeme tercimannı davet etmege mecbur edi», – dep qayd etti Zair Smedlâyev.

Bundan ğayrı, faalniñ malümatına köre, mahkemeci iş boyunca şaatlarnı davet etmek ricasını da red etti. Mahkemeniñ nevbetteki toplaşuvı cumaaqşamı künü, yanvar 29-da, keçirilecek.

Malüm olğanı kibi, Aqmescitniñ Kiyev rayon mahkemesi «Qırım» Fondu» yolbaşçısı Riza Şevkiyevge 350 biñ rublelik ve fondnıñ kendisine 4,5 million rublelik para cezası belgilendi. Fond yolbaşçısı itiraz bildirdi.

XS
SM
MD
LG